तराई अशान्तिबारे प्रधानमन्त्रीको सम्बोधन: संयम अपनाउन र अफवाहको पछि नलाग्न अपिल

काठमाडौं। सुनसरीको देवानगञ्ज तथा सिरहा लगायतका स्थानमा विकसित घटना र उत्पन्न अशान्त वातावरणलाई लिएर प्रधानमन्त्री बालेन्द्र शाहले देशवासीका नाममा सम्बोधन गरेका छन्।

सम्बोधनका क्रममा प्रधानमन्त्री शाहले दुःखद घटनाप्रति सरकार पूर्ण रूपमा गम्भीर र संवेदनशील रहेको बताउँदै ज्यान गुमाएका जयप्रकाश मेहता, ओमप्रकाश मेहता र गणेश यादवप्रति श्रद्धाञ्जली अर्पण गरे। साथै, शोकसन्तप्त परिवारमा समवेदना व्यक्त गर्दै घाइतेहरूको प्रभावकारी उपचारका लागि स्वास्थ्य निकायहरूलाई निर्देशन दिइसकिएको उनले जानकारी दिए।

Advertisement

प्रधानमन्त्री शाहका अनुसार गृह मन्त्रालयले घटनाको निष्पक्ष र पारदर्शी छानबिनका लागि समिति गठन गरिसकेको छ। स्थानीय स्तरमा स्थिति प्रत्यक्ष अनुगमन र शान्ति सुरक्षा सुदृढ बनाउन गृहमन्त्री स्वयं घटनास्थल पुगेको र राष्ट्रिय सुरक्षा परिषद्को बैठक बसी आवश्यक निर्णयहरू लिइएको उनले स्पष्ट पारे। केन्द्रमा सर्वदलीय बैठक र स्थानीय तहमा निरन्तर संवाद भइरहेको उनको भनाइ छ।

नेपालको संविधानले प्रत्येक नागरिकलाई धर्म, संस्कृति र परम्परा मान्ने मौलिक हक दिएको उल्लेख गर्दै प्रधानमन्त्री शाहले कुनै पनि धर्मले हिंसा र विभाजन नसिकाउने बताए। कुनै एक स्थानको घटनालाई लिएर सिङ्गो समुदायलाई आरोपित गर्ने र देशैभर प्रतिशोधको आगो फैलाउने कार्य न्यायसङ्गत नहुने भन्दै उनले अराजकता फैलाउनेमाथि कडा कदम चालिने चेतावनी दिए।

सामाजिक सञ्जालमार्फत अफवाह र घृणा फैलाउने सामग्री प्रचारप्रसार नगर्न र सरकारी निकायका आधिकारिक सूचनामा मात्र विश्वास गर्न अपिल गर्दै उनले सम्पूर्ण नागरिक, राजनीतिक दल, धार्मिक अगुवा तथा सञ्चारमाध्यमलाई राष्ट्रिय एकता र सामाजिक सद्भाव कायम राख्न आह्वान गरे।