देवानगन्जपछि मधेशमा हिंसात्मक प्रदर्शन, गोली लागेर किशोरको मृत्यु

मुलुकी खबर

२०८३ श्रावण १४, बिहीबार २१:२७

मधेश । सुनसरीको देवानगन्ज गाउँपालिका–३ कप्तानगन्जमा भएको घटनाको विरोधमा बिहीबार मधेश प्रदेशका विभिन्न जिल्लामा हिंसात्मक प्रदर्शन भएका छन् । प्रदर्शन हिंसात्मक बन्दा एक किशोरको मृत्यु भएको छ भने प्रहरीसहित कम्तीमा २२ जना घाइते भएका छन् ।

आन्दोलन उग्र बनेपछि सिरहा र धनुषाका केही क्षेत्रमा कर्फ्यु तथा पर्सामा निषेधाज्ञा जारी गरिएको छ । सबैभन्दा गम्भीर घटना सिरहाको गोलबजारमा भएको हो । प्रशासनले कर्फ्यु लागू गरिसकेपछि पनि गोलबजार नगरपालिका–४ क्याम्पस रोड क्षेत्रमा प्रहरीको गोली लागेर धनगढीमाई नगरपालिकाको तुलसियाही निवासी रामवृक्ष यादवका अन्दाजी १५ वर्षीय छोरा गणेश यादव गम्भीर घाइते भएका थिए । उनको उपचारका क्रममा मृत्यु भएको प्रहरीले जनाएको छ । उनको घाँटीमा गोली लागेको थियो ।

सोही घटनामा गोली लागेर घाइते भएका धनुषाको धनुषाधामका सुवास ठाकुरलाई थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान रेफर गरिएको छ । त्यसअघि दिउँसो गोलबजारमा प्रदर्शन चर्किँदै जाँदा झमझम होटल अगाडि प्रदर्शनकारी र प्रहरीबीच झडप भएको थियो । झडपका क्रममा नेपाल टेलिकम अगाडि पार्किङमा रहेका करिब २१ वटा मोटरसाइकल र एउटा साइकलमा आगजनी गरिएको थियो ।

आन्दोलनकारीहरूले गोलबजारस्थित एबी मल, नेहाल आइरन स्टोर, नौसाद मोटरसाइकल ग्यारेज, रोयल प्रिन्स होटल एन्ड पार्टी प्यालेस तथा गोलबजार नगरपालिका–११ का अध्यक्ष सोहेव अनवरको घरमा समेत आगजनी र तोडफोड गरेका छन् । सिरहा प्रहरी प्रमुख एसपी बासुदेव पाठकका अनुसार झडप नियन्त्रणका क्रममा डीएसपी रमेशबहादुर पालसहित नेपाल प्रहरी र सशस्त्र प्रहरीका गरर १५ जना सुरक्षाकर्मी घाइते भएका छन् ।

डीएसपी पालको मुखमा चोट लागेको छ । अन्य सुरक्षाकर्मी तथा स्थानीयको हात, खुट्टा र टाउकोमा चोट लागेको प्रहरीले जनाएको छ । घटनाका बारेमा थप अनुसन्धान भइरहेको छ ।

मधेश प्रदेशको राजधानी जनकपुरधाम पनि बिहीबार बिहानदेखि तनावग्रस्त रह्यो । विभिन्न संघसंस्थाका युवाहरूले रामानन्दचोकबाट प्रदर्शन सुरु गर्दै सडक अवरुद्ध गरेका थिए । प्रदर्शनकारीहरूले बजार बन्द गराउनुका साथै केही स्थानमा तोडफोडसमेत गरेका थिए ।

रामानन्दचोक, बजरंगचोकलगायतका क्षेत्रमा दिनभर प्रहरी र प्रदर्शनकारीबीच पटक–पटक झडप भयो । स्थिति नियन्त्रणमा लिन प्रहरीले दुई दर्जनभन्दा बढी सेल अश्रुग्यास प्रहार गरेको थियो ।

ढुंगामुढाबाट जनकपुरधाम उपमहानगरपालिका–७ का १२ वर्षीय आनन्द दास गम्भीर घाइते भएका छन् । उनको प्रादेशिक अस्पताल जनकपुरमा उपचार भइरहेको धनुषाका प्रमुख जिल्ला अधिकारी प्रेमप्रसाद लुइँटेलले जानकारी दिए । जनकपुरधाम–२० का भोगेन्द्रकुमार राम पनि टाउकोमा चोट लागेर घाइते भएका छन् ।

मधेश प्रदेश प्रहरी कार्यालयका अनुसार धनुषा र सिरहामा भएका झडपका क्रममा १९ जना प्रहरी घाइते भएका छन् । तीमध्ये धनुषामा १५ र सिरहामा चार जना प्रहरी घाइते भएका हुन् ।

परिस्थिति नियन्त्रणबाहिर जाने संकेत देखिएपछि धनुषा प्रशासनले बिहीबार दिउँसो साढे ३ बजेदेखि अनिश्चितकालका लागि कर्फ्यु आदेश जारी गरेको छ । प्रजिअ लुइँटेलका अनुसार जनकपुरधाम उपमहानगरपालिका, नगराइन चोकसम्मको क्षेत्र तथा लक्ष्मीनिया गाउँपालिकाको सोहनी सिनुरजोडा र लक्ष्मीनिया हाटबजारसम्म कर्फ्यु लागू गरिएको छ । कर्फ्यु कार्यान्वयनका लागि नेपाल प्रहरी, सशस्त्र प्रहरी र नेपाली सेना परिचालन गरिएको छ ।

यसैबीच सम्भावित तनावलाई ध्यानमा राख्दै पर्साको वीरगञ्जमा पनि बिहीबार साँझ ५ बजेदेखि शुक्रबार बिहान ६ बजेसम्म निषेधाज्ञा लागू गरिएको छ । प्रमुख जिल्ला अधिकारी भोला दाहालले निषेधाज्ञा आदेश जारी गरेका हुन् । सप्तरीको राजविराज, महोत्तरीको मटिहानी तथा पर्सा, सर्लाही र रौतहटका केही स्थानमा समेत प्रदर्शन भए पनि ठूलो अप्रिय घटना भने भएको छैन ।

जनकपुरधाममा सुरक्षा अवस्था संवेदनशील बनेपछि शुक्रबारका लागि विद्यालय, क्याम्पस तथा अन्य शैक्षिक संस्थाहरू बन्द गर्ने निर्णय गरिएको छ । शैक्षिक संस्थाहरूले संयुक्त विज्ञप्ति जारी गर्दै बिदाको घोषणा गर्दै सम्बन्धित पक्षलाई तत्काल संवादमार्फत समस्या समाधान गर्न आग्रह गरेका छन् ।

उता मधेश प्रदेश सरकारले पनि बढ्दो तनावलाई मध्यनजर गर्दै मन्त्रिपरिषद् बैठक र प्रदेश सुरक्षा परिषद्को बैठक बोलाएको थियो । बैठकले पछिल्ला दिनमा भएका सामाजिक, आर्थिक तथा सार्वजनिक सुरक्षासम्बन्धी घटनाको समीक्षा गर्दै सुरक्षा संयन्त्रसँग समन्वय बढाउने निर्णय गरेको जनाएको छ । मुख्यमन्त्री कृष्णप्रसाद यादवले जारी गरेको विज्ञप्तिमा प्रदेश सरकारले सम्भावित सुरक्षा चुनौती समयमै पहिचान, रोकथाम र प्रभावकारी व्यवस्थापन गर्न सुरक्षा निकाय तथा स्थानीय तहसँग समन्वय गरेर काम गर्ने प्रतिबद्धता जनाइएको छ ।

प्रदेश सरकारले सबै राजनीतिक दल, धार्मिक अगुवा, नागरिक समाज, सञ्चारमाध्यम, निजी क्षेत्र तथा सर्वसाधारणलाई संयमता अपनाई सामाजिक सद्भाव कायम राख्नलाई सहयोग गर्न आग्रह गरेको छ । साथै, सामाजिक सञ्जाल वा सञ्चारमाध्यममार्फत अपुष्ट, भ्रामक तथा हिंसा भड्काउन सक्ने सामग्री प्रकाशन वा प्रसारण नगर्न पनि अपिल गरेको छ ।

तपाइको प्रतिक्रिया