विराटनगरमा नाराबाजी र प्रदर्शनबीच गृहमन्त्रीले भेटे गोलीकाण्डका घाइते, विमानस्थलमै एक घण्टा सुरक्षा ब्रिफिङ

विराटनगर । सुनसरीको देवानगन्ज गाउँपालिका–३ कप्तानगन्जमा भएको गोलीकाण्डका घाइतेलाई भेट्न बिहीबार राति विराटनगर आएका गृहमन्त्री सुदन गुरुङ र स्वास्थ्य तथा खाद्य स्वच्छता मन्त्री निशा मेहता अस्पताल पुगेका बेला बाहिर प्रदर्शन र नाराबाजी भएको छ ।

घाइतेहरूको उपचार भइरहेको न्युरो अस्पतालमा मन्त्रीद्वय प्रवेश गरेलगत्तै अस्पताल बाहिर भेला भएका दर्जनौँ प्रदर्शनकारीले सरकारविरुद्ध चर्को नाराबाजी गरेका थिए । प्रदर्शनकारीहरूले गोलीकाण्डमा ज्यान गुमाएकालाई सहिद घोषणा गर्नुपर्ने, परिवारलाई उचित क्षतिपूर्ति दिनुपर्ने, दोषीमाथि कारबाही गर्नुपर्ने तथा हिन्दु राज्य घोषणा गर्नुपर्ने लगायतका माग राख्दै चर्को नाराबाजी गरेका हुन् ।

Advertisement

उनीहरुले ‘बालेन सरकार होसियार’, ‘हिन्दु राज्य घोषणा गर’, ‘मान्छे मार्न पाइँदैन’ लगायतका नारा लगाएका थिए । प्रदर्शनकारीले प्रधानमन्त्री बालेन्द्र शाह (बालेन) र गृहमन्त्री सुधन गुरुङको राजीनामा पनि मागेका छन् । उनीहरुले गोलीकाण्डका बारेमा सरकारको जवाफ पनि माग गरेका छन् । गृहमन्त्रीविरुद्ध पनि चर्को नाराबाजी भएको छ । नाराबाजीका कारण अस्पताल परिसर केहीबेर तनावग्रस्त बनेको थियो ।

प्रदर्शनकारी र मोरङ प्रहरी प्रमुख एसपी कवित कटवालबीच केहीबेर भनाभनसमेत भएको थियो । एसपी कटवालले घटनाको निष्पक्ष छानबिन भइरहेको भन्दै हतारमा निष्कर्षमा नपुग्न आग्रह गरेका थिए । सम्भावित अप्रिय अवस्था रोक्न नेपाल प्रहरी र सशस्त्र प्रहरीको ठूलो सुरक्षा घेरा परिचालन गरिएको थियो ।

त्यसअघि बुद्ध एयरको जहाजमार्फत साँझ करिब ७ बजे विराटनगर विमानस्थलमा ओर्लिएका गृहमन्त्री गुरुङले झण्डै एक घण्टासम्म कोशी प्रदेशका सुरक्षा अधिकारीहरुसँग सुनसरीको देवानगन्जलगायतका स्थानको सुरक्षा अवस्थाका बारेमा विस्तृत ब्रिफिङ लिएका थिए । बैठकमा सहभागी एक सुरक्षा अधिकारीका अनुसार सुरक्षा निकायले देवानगन्ज क्षेत्रको अवस्था नियन्त्रणउन्मुख भए पनि पूर्ण रूपमा चुनौतीमुक्त भने नरहेको जानकारी गराएका थिए ।

विमानस्थलमा प्रतिक्रिया लिन पुगेका सञ्चारकर्मीहरूसँग भने गृहमन्त्रीले कुनै प्रतिक्रिया दिएनन् । मोरङ प्रहरी प्रमुख एसपी कवित कटवालले पत्रकारहरूलाई ‘गृहमन्त्री ज्यूलाई कुनै पनि प्रश्न नसोध्नुहोला’ भन्ने सूचना दिएका थिए । सुरक्षा ब्रिफिङपछि गृहमन्त्रीको टोली विराट नर्सिङ होम पुगेको थियो ।

त्यहाँ उपचाररत चार जना घाइतेको स्वास्थ्य अवस्थाका बारेमा जानकारी लिँदै उनले उपचारमा सरकारले कुनै कमी हुन नदिने र दोषीमाथि कानुनी कारबाही हुने आश्वासन दिए । उनले घटनाको छानबिन जारी रहेकाले केही समय धैर्य गर्न पनि आग्रह गरेका छन् ।

त्यसपछि मन्त्रीद्वय न्युरो अस्पताल पुगेका हुन् । न्युरोमा तीन जना घाइतेको उपचार भइरहेको छ । गृहमन्त्री र स्वास्थ्यमन्त्रीले त्यहाँ पनि घाइतेसँग भेटघाट गरी उपचारको अवस्थाका बारेमा जानकारी लिएका थिए ।

कप्तानगन्जमा दुई पक्षबीचको विवाद हिंसात्मक झडपमा परिणत भएपछि त्यसलाई नियन्त्रणमा लिन सशस्त्र प्रहरीले चलाएको गोली लागेर १० जना युवा घाइते भएका थिए । घाइतेमध्ये गम्भीर अवस्थाका देवानगन्ज–४ का २५ वर्षीय ओमप्रकाश मेहताको केहीबेरमा मृत्यु भएको थियो ।

देवानगन्ज–३ का २२ वर्षीय जयप्रकाश मेहताको पनि उपचारका क्रममा बिहीबार दिउँसो विराटनगरको न्युरो अस्पतालमा मृत्यु भएको छ । योसँगै कप्तानगन्ज गोलीकाण्डमा मृत्यु हुनेको संख्या दुई पुगेको छ । घटनामा गोली लागेर घाइते भएकामध्ये आठ जना उपचाररत रहेकामा एक जनालाई बिहीबार साँझ थप उपचारका लागि काठमाडौं लगिएको छ ।

घटनापछि देवानगन्जसहित सुनसरीका विभिन्न स्थानमा तनाव फैलिएको थियो । स्थानीयको मागपछि घटनास्थलको अवस्था बुझ्न र मृतक तथा घाइते परिवारसँग भेटघाट गर्न गृहमन्त्री विराटनगर आएका हुन् । कप्तानगन्जबाट सुरु भएको हिंसाको आगो मधेश प्रदेशसम्म फैलिएको छ ।

ठूलो हिंसा फैलिँदा पनि बेवास्ता गरेको भन्दै सरकारको चौतर्फी आलोचना भइरहेको छ । सबैतिरबाट विरोध हुन थालेपछि गृहमन्त्री गुरुङ घाइतेको अवस्था र घटनापछिको परिस्थिति बुझ्न विराटनगर आएका हुन् ।

विराटनगरका अस्पतालमा उपचाररत सबै घाइतेसँग भेटघाट सकेपछि गृहमन्त्रीसहितको टोली इनरुवा जाने कार्यक्रम रहेको सुरक्षा स्रोतले बतायो । देवानगन्ज जाने वा नजाने भन्ने विषयमा भने सुरक्षा निकायबाट ब्रिफिङ लिएपछि गृहमन्त्रीले निर्णय लिने बताइएको छ । स्रोतका अनुसार सुरक्षा अवस्थाको मूल्यांकनका आधारमा मात्रै गृहमन्त्रीले देवानगन्जको विषयमा निर्णय लिने छन् ।