वैकल्पिक सडक निर्माण अघि बढाउन ध्यानाकर्षण

काठमाडौं। इलामको सिमलगोलाई-तिल्केनी १२ किलोमिटर वैकल्पिक सडक निर्माण कार्य तत्काल अघि बढाउन राष्ट्रिय स्वतन्त्र पार्टी (रास्वपा) ले सडक विभागको ध्यानाकर्षण गराएको छ।

रास्वपाका इलाम जिल्ला सभापति दिनेश महत नेतृत्वको टोलीले शुक्रबार सडक विभागका महानिर्देशक डा. विजय जैसीलाई भेट गरी सडक निर्माण कार्य यथाशीघ्र सुरु गर्न आवश्यक पहलका लागि आग्रह गरेको हो।

Advertisement

मेची राजमार्गमा पटक-पटक हुने अवरोधका कारण यो वैकल्पिक सडकको निर्माण अत्यन्त आवश्यक रहेको बताउँदै टोलीले आवश्यक बजेट व्यवस्थापन, प्राविधिक प्रक्रिया तथा कार्यान्वयनलाई प्राथमिकताका साथ अघि बढाउन अनुरोध गरेको छ।

इलामवासीको दीर्घकालीन हित र सहज आवागमनका लागि यो महत्वपूर्ण योजना शीघ्र कार्यान्वयन हुने विश्वास रास्वपा टोलीले व्यक्त गरेको छ।

यसअघि टोलीले मेची राजमार्गको दीर्घकालीन वैकल्पिक मार्ग निर्माणसहितका पूर्वाधार योजनामा बजेट व्यवस्थापन गर्न पूर्वाधार विकास मन्त्री सुनिल लम्सालको ध्यानाकर्षण गराएको थियो । रास्वपा इलामका प्रतिनिधिहरूले मन्त्री लम्साललाई भेटेर १२ किलोमिटर सिमलगोलाई–तिलकेनी सडक निर्माण, जोगमाई खोलामा पक्की पुल निर्माण र उक्त सडकलाई राष्ट्रिय सडक सञ्जालमा समावेश गर्न माग गरेका हुन्।

साथै विभिन्न स्थानीय तहका अत्यावश्यक सडक, पुल र खानेपानी योजनाहरूका लागि तत्काल बजेट विनियोजन गरी कार्यान्वयनमा लैजान आग्रह गरिएको छ। भेटका क्रममा मन्त्री लम्सालले देखिएका समस्या समाधानका लागि चाँडै बजेट विनियोजन गर्ने प्रतिबद्धता जनाएको रास्वपा इलामका सभापति महतले जानकारी दिए।

अविरल वर्षाका कारण मेची राजमार्गसहितका वैकल्पिक सडकहरूमा बाढी पहिरोले अवरोध पुर्‍याउँदा इलाम, पाँचथर, ताप्लेजुङ र झापाका यात्रुहरूले सास्ती व्यहोर्नुपरेको छ। सडक अवरुद्ध हुँदा उपभोग्य सामग्रीको ढुवानी सहज हुन नसकी बजारमा दैनिक उपभोग्य वस्तुको अभाव सिर्जना हुन थालेको छ।