डुंगामा आगलागी, ११२ जनाको जीवितै उद्धार

एजेन्सी । इन्डोनेसियाको पश्चिम नुसा तेङ्गारा प्रान्तस्थित लोम्बोक टापुनजिकै समुद्रमा ‘पुत्री यास्मिन’ नामक यात्रुवाहक डुंगामा आगलागी भएको छ। दुर्घटनापछि उद्धार टोलीले ११२ जनालाई सकुशल उद्धार गरेको स्थानीय अधिकारीहरूलाई उद्धृत गर्दै सञ्चारमाध्यमहरूले जनाएका छन्।

उद्धार गरिएकाहरूमध्ये ३६ जनालाई नजिकैको अर्को डुंगाले नियन्त्रणमा लिई बाली फर्काएको थियो भने खोजी तथा उद्धार एजेन्सीको टोलीले ५९ जनाको उद्धार गरेको छ। त्यस्तै नौसेनाको जहाजले थप १७ जनालाई समुद्रबाट जीवितै निकालेको जनाइएको छ।

उक्त डुंगामा ११४ जना यात्रु र १७ जना चालक दलका सदस्य सवार थिए। दुर्घटनामा कुनै पनि यात्रु वा चालक दलका सदस्यको मृत्यु वा क्षति भएको खबर अहिलेसम्म प्राप्त नभएको प्रहरी तथा उद्धार अधिकारीहरूले पुष्टि गरेका छन्।

‘पुत्री यास्मिन’ नामको उक्त डुङ्गा बालीबाट लोम्बोक टापुतर्फ जाँदै गर्दा बीच बाटोमै आगलागी भएको थियो। आगलागी हुनुको मुख्य कारण भने अझै खुल्न सकेको छैन र घटनाबारे थप अनुसन्धान भइरहेको छ।