पत्रकार खेम भण्डारीविरुद्ध सर्वोच्च अदालतमा अवहेलना मुद्दा दायर

Share this
703shares
मुलुकी खबर
मुलुकी खबर
clock२०८३ साउन २९, शुक्रबार १९:४१

काठमाडौं । कञ्चनपुरका पत्रकार खेम भण्डारीविरुद्ध सर्वोच्च अदालतमा अवहेलना मुद्दा दायर भएको छ। अधिवक्ता वीरभद्र जोशीले बिहीबार सर्वोच्च अदालतमा पत्रकार भण्डारीविरुद्ध अवहेलना मुद्दा दायर गरेका हुन्।

गत साउन २३ गते कञ्चनपुरको महेन्द्रनगरमा आयोजित पत्रकार सम्मेलनमा भण्डारीले ‘न्यायाधीशले सेटिङ गर्छन्’ र ‘न्यायाधीशका घरमा बोरामा पैसा छ, छापा हान्नुपर्छ’ भन्ने अभिव्यक्ति दिएर अदालतको अवहेलना गरेको अधिवक्ता जोशीको दाबी छ। मुद्दाको पेसी सोमबारका लागि तोकिएको छ।

गाली बेइज्जती मुद्दामा ३७ दिन कारागार बसेर छुटेपछि भण्डारीले पत्रकार सम्मेलन गर्दै लागुऔषध मुद्दामा प्रहरी, वकिल, कर्मचारी र न्यायाधीश सबै मालामाल भइरहेको आरोप लगाएका थिए।

यसअघि सर्वोच्च अदालतले न्यायाधीशको सम्पत्ति छानबिन नगर्न दिएको अन्तरिम आदेशमाथि पनि उनले प्रश्न उठाएका थिए। भण्डारीले ‘न्यायाधीशको घरभरि पैसा छ’ भनेर वक्तव्य दिँदै अदालतको मानहानि गरेको रिट निवेदनमा उल्लेख छ।

यसैबीच, पत्रकार सम्मेलनमा भण्डारीले महेन्द्रनगरस्थित होटल ओपेरामाथि आक्षेप लगाएको भन्दै होटल व्यवस्थापनले विज्ञप्ति जारी गरी उक्त भनाइ सच्याउन चेतावनी दिएको छ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.