प्रहरी महानिरीक्षक कार्कीद्वारा कार्यसम्पादन प्रभावकारी बनाउन निर्देशन

काठमाडौं। नेपाल प्रहरीका महानिरीक्षक (आईजीपी) दानबहादुर कार्कीले देशभरका प्रहरी कार्यालय तथा विभिन्न युनिटका प्रमुखहरूलाई समसामयिक विषयमा आवश्यक निर्देशन दिएका छन्।

आईजीपी कार्कीले बिहीबार भर्चुअल माध्यमबाट नेपाल प्रहरीका सबै ब्युरो, प्रदेश प्रहरी कार्यालय, तालिम केन्द्र, जिल्ला प्रहरी कार्यालय तथा परिसर, ट्राफिक प्रहरी कार्यालय, विशेष सुरक्षा गण र विमानस्थल सुरक्षा कार्यालयलगायतका प्रमुखहरूलाई सम्बोधन गर्दै निर्देशन दिएका हुन्।

Advertisement

भर्चुअल बैठकमा राष्ट्रिय प्रहरी प्रशिक्षण प्रतिष्ठान महाराजगञ्ज, नेपाल प्रहरी अस्पताल, काठमाडौँ उपत्यका प्रहरी कार्यालय रानीपोखरी, काठमाडौँ उपत्यका अपराध अनुसन्धान कार्यालय टेकु, काठमाडौँ उपत्यका ट्राफिक प्रहरी कार्यालय रामशाहपथ, नेपाल प्रहरी अपराध अनुसन्धान विद्यालय, नेपाल प्रहरी शिक्षालय भरतपुर तथा नेपाल प्रहरी युक्ति तालिम महाविद्यालय जर्गाहका प्रमुखहरू सहभागी थिए।

यस्तै, सबै प्रदेश प्रहरी गण, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, प्रदेश प्रहरी तालिम केन्द्र, जिल्ला ट्राफिक प्रहरी कार्यालय, प्रहरी वृत्त तथा इलाका प्रहरी कार्यालयका प्रमुखहरूलाई सम्बोधन गर्दै आईजीपी कार्कीले समसामयिक सुरक्षा अवस्था, प्रहरी कार्यसम्पादन तथा सङ्गठनका विभिन्न विषयमा केन्द्रित रहेर निर्देशन दिएका छन्।