काठमाडौंमा चोर्ने, गाउँमा रमाउने सोबितको ‘अपराध शैली’

काठमाडौं । काठमाडौंका सडकमा पार्किङ गरिएका स्कुटरहरू ५४ वर्षीय सोबित कार्कीका लागि कुनै ‘एटीएम मेसिन’ भन्दा कम थिएनन् । मोबाइलमा कसैलाई फोन गरिरहेको नाटक गर्ने, गोजीबाट साँचो निकालेर सुटुक्क डिकी खोल्ने र पलभरमै लाखौँ रुपैयाँ कुम्ल्याएर गायब हुने उनको शैलीले अहिले प्रहरीलाई समेत चकित तुल्याएको छ । पछिल्लो ५ महिनामा मात्रै विभिन्न स्कुटरको डिकीबाट १२ लाख रुपैयाँ सफा गरेका यी ‘सिरियल चोर’ अन्ततः २१ वटा साँचोसहित प्रहरीको फन्दामा परेका छन् ।

मोरङको मिक्लाजुङ गाउँपालिका–९ घर भएका कार्कीको अपराध गर्ने तरिका निकै योजनाबद्ध देखिन्छ । काठमाडौं आएपछि होटेलमा बस्ने, दिनभर डिकीमा आँखा लगाउने र ठुलो रकम चोरी गरेपछि गाउँ फर्किएर मोज मस्ती गर्ने उनको दिनचर्या थियो । भदौ २ गते गोंगबुबाट पक्राउ परेका उनको साथबाट प्रहरीले विभिन्न कम्पनीका २१ वटा साँचो बरामद गरेको छ ।

Advertisement

उपत्यका अपराध अनुसन्धान कार्यालयका अनुसार, उनले गत चैतदेखि हालसम्म ७ ठाउँमा चोरी गरेको पुष्टि भइसकेको छ । विशेषगरी गोंगबु, जावलाखेल, कुमारीपाटी र नख्खु क्षेत्रलाई निशाना बनाउने कार्कीले एकै पटक ५ लाखसम्म चोरी गरेका थिए । असार २२ मा सामाखुसीमा मास्क लगाएर पुगेका उनले फोनमा कुरा गरेको बहाना गर्दै स्कुटरको डिकीबाट ३ लाख रुपैयाँ निकालेर हिँडेको दृश्य सीसीटीभीमा प्रस्ट देखिएको छ ।

प्रहरीले गौशालास्थित संगम होटेलमा उनी बसेको कोठा खानतलासी गर्दा चोरीको १ लाख ३३ हजार रुपैयाँ डस्बिनभित्र लुकाएको अवस्थामा फेला पारेको थियो । २०७६ सालमा पनि चोरीकै मुद्दामा जेल सजाय काटिसकेका कार्कीले चोरीको रकम खर्च भएपछि पुनः काठमाडौं आएर डिकी फुटाउने गरेको अनुसन्धानबाट खुलेको छ ।

हाल उनीमाथि प्रहरी वृत्त महाराजगन्जले अदालतबाट म्याद लिएर थप अनुसन्धान अगाडि बढाएको छ । स्कुटरको डिकीमा महँगा सामान र ठुलो नगद राख्ने सर्वसाधारणका लागि कार्कीको यो अपराध शैली एउटा गम्भीर चेतावनी बनेको छ ।