भोटेकोशीमा बहाव बढ्यो, सतर्कता अपनाउन आग्रह

रसुवा । चीनतर्फको छोचेन खोला र पुरेपु त्साङ्पो नदीको संगम नजिक बनेको ताल फुटेपछि भोटेकोशी नदीमा पानीको बहाव बढेको छ । बाढीको बहाव बढ्दै गएपछि भोटेकोशी र त्रिशूली नदीको तटीय क्षेत्रमा उच्च सतर्कता अपनाउन बाढी पूर्वानुमान महाशाखाले आग्रह गरेको छ ।

महाशाखाका अनुसार भोटेकोशीमा पानीको सतह बढेसँगै बाढी स्याफ्रुबेँसी क्षेत्र पार गरिसकेको छ । सम्भावित जोखिमलाई ध्यानमा राख्दै त्रिशूली नदीको तटीय क्षेत्र हुँदै मुग्लिनसम्मका बासिन्दालाई अर्को सूचना जारी नभएसम्म सुरक्षित स्थानमा रहन आग्रह गरिएको छ ।

Advertisement

रसुवाका प्रमुख जिल्ला अधिकारी नरेन्द्र परियारका अनुसार चीनतर्फबाट ताल फुटेको सूचना प्राप्त भएपछि तटीय क्षेत्रका नागरिकलाई सतर्क रहन आग्रह गरिएको हो । छोचेन खोला र पुरेपु त्साङ्पो नेपालतर्फ रसुवागढी नजिक प्रवेश गरेपछि भोटेकोशी नदीमा मिसिन्छन् ।

बिहीबार बिहानसम्म उक्त तालमा करिब २० लाख घनमिटर पानी जम्मा भएको थियो । चीनको जलस्रोत मन्त्रालयले आगामी तीन दिनमा थप ३० लाख घनमिटर पानी जम्मा हुन सक्ने अनुमान गरेको थियो । सम्भावित जोखिमलाई ध्यानमा राख्दै चिनियाँ जलस्रोत मन्त्रालयले तालको अवस्थाको निरन्तर निगरानी गरिरहेको जनाएको छ ।

बाढीको अवस्था थप गम्भीर हुन सक्ने भएकाले नदी आसपासका बस्ती तथा तटीय क्षेत्रका नागरिकलाई जोखिमयुक्त स्थानबाट टाढा रहन र आवश्यक सावधानी अपनाउन महाशाखाले आग्रह गरेको छ । स्थानीयलाई सरकारी तथा सम्बन्धित निकायबाट जारी हुने सूचना नियमित रूपमा हेर्न र सोहीअनुसार सुरक्षा उपाय अपनाउन पनि अनुरोध गरिएको छ ।