बाढीले देश अस्तव्यस्त, सत्ताका जिम्मेवारहरू भने रात्रिभोजमा

काठमाडौं । भोटेकोशी नदीमा आएको भीषण बाढीले जनजीवन प्रभावित भएर देश नै अस्तव्यस्त भएका बेला सरकारका जिम्मेवारहरुको तिविधिलाई लिएर प्रश्न उठेको छ ।

बाढीमा परेकाहरूको खोजी तथा उद्धारका लागि परिवारजन र आफन्तहरू व्यग्र भइरहेका समयमा मन्त्री तथा सत्तारूढ दलका नेताहरू विदेशी पाहुनासँग पाँचतारे होटलमा रात्रिभोजमा सहभागी भएको तस्बिर सार्वजनिक भएको हो । भारतीय लेखक तथा राजनीतिज्ञ शशि थरूर आफ्नो पुस्तक ‘म किन हिन्दू’ सार्वजनिक गर्न नेपाल आएका छन् ।

Advertisement

पुस्तक सार्वजनिक कार्यक्रमपछि थरूरले नेपालका उच्च राजनीतिक तथा सरकारी अधिकारीहरूसँग भेटघाट गरेका छन् । यसै क्रममा अर्थमन्त्री स्वर्णिम वाग्ले, परराष्ट्रमन्त्री शिशिर खनाल तथा सत्तारुढ राष्ट्रिय स्वतन्त्र पार्टी (रास्वपा)का सभापति रवि लामिछानेसहितका नेताहरूले थरूरसँग भेट गरेका हुन् । भेटघाटपछि रात्रिभोजमा सहभागी भएको विवरणसमेत सार्वजनिक भएको छ ।

थरूरले अर्थमन्त्री वाग्लेसँगको भेटलाई सामाजिक सञ्जालमार्फत सार्वजनिक गर्दै नेपालको आर्थिक अवस्था, चुनौती र सम्भावनाका बारेमा छलफल भएको उल्लेख गरेका छन् । उनले वाग्लेको पारिवारिक पृष्ठभूमिदेखि नयाँ पुस्ताका राजनीतिक नेतृत्वसम्मका विषयमा समेत टिप्पणी गरेका छन् ।

थरूरले रवि लामिछाने र परराष्ट्रमन्त्री शिशिर खनालसँग भएको भेटका बारेमा पनि सामाजिक सञ्जालमा उल्लेख गरेका छन् । अन्तर्राष्ट्रिय सम्बन्ध समितिकी सभापति सुम्निमा उदाससँग पनि भेट भएको उनको भनाइ छ ।

तर, बाढीका कारण ठूलो संख्यामा मानिस प्रभावित भएको, केहीको शव फेला परेको, शव भेटिने क्रम जारी रहेको र अझै धेरै सम्पर्कविहीन रहेको अवस्थामा राज्यका उच्च जिम्मेवार व्यक्तिहरूको प्राथमिकतामाथि नै प्रश्न उठेको छ । राजनीतिक विश्लेषक देवराज दाहालले विपद्का बेला राज्यका जिम्मेवार व्यक्तिहरूले आफ्नो गतिविधि र प्राथमिकताप्रति थप संवेदनशील हुनुपर्ने बताए ।

उनका अनुसार संकटको समयमा उद्धार, राहत र पीडितको अवस्थालाई प्राथमिकतामा राख्नु सरकारको प्रमुख दायित्व हो । बाढी र त्यसबाट सिर्जित मानवीय संकटका बीच सार्वजनिक भएका तस्बिरहरुले सरकारको संवेदनशीलता र प्राथमिकताका बारेमा राजनीतिक तथा सामाजिक बहससमेत चर्काएको छ ।