इलामको माईखोलामा एक्कासि लेदोसहितको बाढी आएपछि…

Share this
699shares
मुलुकी खबर
मुलुकी खबर
clock२०८३ भदौ १२, शुक्रबार १८:२३

इलाम । इलामको माईखोलामा एक्कासि लेदोसहितको बाढी आएको छ । मेची राजमार्गको राजदुवाली आसपास क्षेत्रमा वर्षा नभएको तर यस्तो बाढी आएपछि स्थानीय बासिन्दा अनेक अनुमान लगाइरहेका छन् ।

कतिपयले जिल्लाको माथिल्लो भेगमा कतै पहिरो गएर थुनिएको बाढी आएको हो कि भन्ने अनुमान पनि गरेका छन् । जिल्लाको उत्तरपूर्वी भेगमा ठूलो वर्षा भएका कारण स्वाभाविक रुपमा बाढी आएको त्यस क्षेत्रका बासिन्दाको भनाइ छ ।

माईखोलामा अरु बेलाजस्तै बाढी आए पनि कतै खोला थुनिएको भन्ने खबर सत्य नभएको इलाम नगरपालिका–२, सुम्बेकका वडाध्यक्ष गिरिराज रिजालले बताएका छन् । कतिपयले खोला थुनिएको भएर लेदो सहितको बाढी आएको भनेर चर्चा गरे पनि त्यस्तो नभएको उनको भनाइ छ ।

स्थानीय गोकुल अधिकारी रसुवा, नुवाकोट क्षेत्रमा आएको विनाशकारी बाढीपछि देशैभरि एकखाले त्रास फैलिएकाले कतिपयले ठूलै जोखिम पो हो कि भन्ने अनुमान लगाउनु स्वाभाविक भएको बताउँछन् । यसैबीच, उत्तरी क्षेत्रमा निरन्तर वर्षा भइरहे माईखोलामा पानीको सतह बढ्न सक्ने भन्दै नदी तटीय क्षेत्रका बासिन्दालाई सतर्कता अपनाउन स्थानीय प्रशासनले आग्रह गरेको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.