देशभर वर्षाको सम्भावना, केही स्थानमा अति भारी वर्षाको चेतावनी

काठमाडौं । देशभर मनसुनी वायुको प्रभाव कायम रहेकाले आज (शनिबार) पनि अधिकांश भू–भागमा वर्षा हुने सम्भावना रहेको छ । मौसम पूर्वानुमान महाशाखाका अनुसार मनसुनको न्यून चापीय रेखा पश्चिमतर्फ सरदर स्थानभन्दा केही उत्तर र पूर्वतर्फ सरदर स्थान आसपास रहेको छ ।

शनिबार बिहान कर्णाली र सुदूरपश्चिम प्रदेशका हिमाली तथा पहाडी भू–भागमा सामान्यतया बदली रहेको छ भने देशका अन्य भू–भागमा आंशिक बदली देखिएको छ । देशका विभिन्न स्थानमा बिहानैदेखि वर्षासमेत भइरहेको विभागले जनाएको छ ।

Advertisement

शनिबार दिउँसो देशभर सामान्यतया बदली रहनेछ । हिमाली तथा पहाडी क्षेत्रका धेरै स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ । लुम्बिनी र सुदूरपश्चिम प्रदेशका तराईका धेरै स्थान, बागमती र गण्डकी प्रदेशका तराईका केही स्थान तथा मधेश र कोशी प्रदेशका तराईका थोरै स्थानमा पनि मेघगर्जन र चट्याङसहित मध्यम वर्षा हुन सक्ने पूर्वानुमान छ ।

दिउँसो कोशी, बागमती र गण्डकी प्रदेशका हिमाली तथा पहाडी भू–भाग, कर्णाली प्रदेशको पहाडी क्षेत्र तथा गण्डकी, लुम्बिनी र सुदूरपश्चिम प्रदेशका पहाडी तथा तराई भू–भागका एक–दुई स्थानमा भारी वर्षाको सम्भावना रहेको छ । शनिबार राति पनि देशभर सामान्यतया बदली रहनेछ । कोशी, बागमती र गण्डकी प्रदेशका हिमाली क्षेत्रका धेरै स्थानमा, लुम्बिनीका केही तथा कर्णाली र सुदूरपश्चिमका हिमाली भू–भागका थोरै स्थानमा मेघगर्जन र चट्याङसहित मध्यम वर्षा तथा हिमपात हुन सक्ने महाशाखाले जनाएको छ ।

रातको समयमा बागमती, गण्डकी र लुम्बिनी प्रदेशका पहाडी भू–भागका धेरै स्थान तथा कोशीका पहाडी भू–भागका केही स्थानमा मेघगर्जन र चट्याङसहित मध्यम वर्षाको सम्भावना छ । कर्णाली र सुदूरपश्चिमका पहाडी क्षेत्रमा पनि केही स्थानमा वर्षा हुन सक्नेछ । तराईका केही स्थानमा समेत मेघगर्जन र चट्याङसहित मध्यम वर्षाको सम्भावना रहेको छ ।

राति कोशी, बागमती र गण्डकी प्रदेशका हिमाली तथा पहाडी भू–भागका थोरै स्थानमा भारी वर्षा हुन सक्ने तथा बागमती र गण्डकी प्रदेशका हिमाली तथा पहाडी भू–भागका एक–दुई स्थानमा अति भारी वर्षासमेत हुन सक्ने पूर्वानुमान गरिएको छ ।

यसैबीच, शनिबार बिहान देशका विभिन्न क्षेत्रमा वर्षा भइरहेको छ । विभागले बिहान ४ः४० बजे सार्वजनिक गरेको विवरणअनुसार सिन्धुपाल्चोकको दुवाचौर मौसम मापन केन्द्रमा पछिल्लो एक घण्टामा १९.६ मिलिमिटर वर्षा मापन भएको छ । उक्त अवधिमा दुवाचौरमा देशकै सबैभन्दा धेरै वर्षा मापन गरिएको हो ।

हाल कोशी, बागमती, गण्डकी, कर्णाली र सुदूरपश्चिम प्रदेशका थोरै स्थानमा हल्कादेखि मध्यम वर्षा भइरहेको महाशाखाले जनाएको छ । वर्षा भइरहेका क्षेत्र तथा आसपासका भू–भागमा थप वर्षा हुन सक्ने भएकाले सम्भावित जोखिमलाई ध्यानमा राख्दै आवश्यक सावधानी अपनाउन महाशाखाले सबैलाई आग्रह गरेको छ ।