बाढी र पहिरोले मुख्य राजमार्ग प्रभावित

काठमाडौं । अविरल वर्षासँगै आएको बाढी, पहिरो र सडक कटानका कारण देशका विभिन्न मुख्य राजमार्ग तथा सडकखण्डमा यातायात प्रभावित भएको छ ।

नेपाल प्रहरीले सार्वजनिक गरेको पछिल्लो विवरणअनुसार काठमाडौं उपत्यकासहित कोशी, बागमती, लुम्बिनी र कर्णाली प्रदेशका विभिन्न सडकखण्डमा पूर्ण तथा आंशिक अवरोध देखिएको हो । काठमाडौंको नागढुंगा–मुग्लिन सडकखण्ड बाढीको सम्भावित जोखिमका कारण प्रभावित भएको छ । बैरेनी बजारको करिब एक किलोमिटर क्षेत्रमा भने एकतर्फी रूपमा सवारी सञ्चालन भइरहेको प्रहरीले जनाएको छ ।

Advertisement

कोशी प्रदेशअन्तर्गत इलाम नगरपालिका–९ राजदुवालीस्थित मेची राजमार्ग पूर्ण रूपमा अवरुद्ध भएको छ । सो क्षेत्रमा वैकल्पिक बाटो भने रहेको प्रहरीले जनाएको छ।

बागमती प्रदेशमा काभ्रेको बीपी राजमार्गअन्तर्गत खुर्कोट–नेपालथोक–कटुन्जेबेँसी सडकखण्डमा रातिको समयमा सम्पूर्ण सवारीसाधन सञ्चालनमा रोक लगाइएको छ । बिहानको समयमा भने अवस्था हेरेर सवारी सञ्चालन गर्न दिइने व्यवस्था गरिएको छ ।

मकवानपुरको हेटौँडा–भीमफेदी–बागमती–ललितपुर सडकखण्डमा पनि रातिको समयमा सवारी आवागमनमा रोक लगाइएको छ । त्यस्तै, कान्तिलोकपथमा समेत वर्षाका कारण राति सवारी सञ्चालन बन्द गरिएको छ ।

नुवाकोटको टोखा–छहरे सडकखण्डमा सम्भावित बाढी तथा पहिरोको जोखिमलाई ध्यानमा राख्दै रातिको समयमा अत्यावश्यक सेवाबाहेकका सवारीसाधन सञ्चालनमा रोक लगाइएको छ ।

रसुवामा बाढी तथा पहिरोका कारण सडकको अवस्था थप जोखिमपूर्ण बनेको छ । उत्तरगया गाउँपालिका–५ खाल्टेस्थित त्रिशूली–मैलुङ–स्याफ्रुबेँसी सडकखण्ड पूर्ण रूपमा अवरुद्ध भएको छ । त्यस्तै, जिल्लाका अन्य मुख्य सडकखण्डमा समेत यातायात प्रभावित भएको प्रहरीले जनाएको छ ।

धादिङको पृथ्वी राजमार्गअन्तर्गत बेनीघाट रोराङ गाउँपालिका–१० का ज्वाङखोला, गजुरी, गलौंदी, जहरेखेत, बाङ्गेमोड तथा बैरेनीलगायतका क्षेत्रमा बाढी, लेदो र पहिरोको जोखिम देखिएको छ । उक्त सडकमा अवस्था हेरेर एकतर्फी रूपमा सवारी सञ्चालन गरिएको छ ।

सिन्धुपाल्चोकको अरनिको राजमार्गअन्तर्गत भोटेकोशी गाउँपालिका–२ कोदारी क्षेत्रमा पहिरो तथा सडक भासिएपछि राजमार्ग पूर्ण रूपमा अवरुद्ध भएको छ । लुम्बिनी प्रदेशको रोल्पास्थित परिवर्तन गाउँपालिका–४ खरिबोटमा पहिरो खसेपछि सहिद राजमार्ग पूर्ण रूपमा अवरुद्ध भएको छ ।

त्यसैगरी कर्णाली प्रदेशको रुकुम पश्चिममा आठबीसकोट नगरपालिका–६ रिजेगाड खोलास्थित जाजरकोट–डोल्पा सडकखण्ड बाढीका कारण पूर्ण रूपमा अवरुद्ध भएको छ । प्रहरीले वर्षायाममा जुनसुकै बेला बाढी, पहिरो तथा सडक कटान हुनसक्ने भएकाले यात्रामा निस्कनुअघि सडकको अवस्थाका बारेमा जानकारी लिएर मात्र यात्रा गर्न र जोखिमयुक्त सडकमा विशेष सावधानी अपनाउन आग्रह गरेको छ ।