चितवनमा भेटिएका २२९ शव डीएनए नमुना राखेर व्यवस्थापन गरिने

चितवन । रसुवाको भोटेकोसी बाढीमा परी मृत्यु भई बगेर चितवनसम्म पुगेका पहिचान हुन नसकेका शव जमिनमुनि गाडिने भएको छ । जिल्ला प्रशासन कार्यालयमा बसेको जिल्ला सुरक्षा समितिको बैठकले शवहरू दुर्गन्धित बन्दै गएपछि सङ्क्रमण फैलिन नदिन यस्तो निर्णय गरेको हो ।

नारायणी र त्रिशूली नदी किनारबाट सङ्कलित २३३ शवमध्ये चार वटाको मात्रै पहिचान भएको छ । बाँकी २२९ शव होल्डिङ सेन्टर तथा विभिन्न स्वास्थ्य संस्थामा राखिएको प्रमुख जिल्ला अधिकारी गणेश अर्यालले बताए ।

Advertisement

नदी तट तथा होल्डिङ सेन्टरमा राखिएका शव र त्यसका अवशेषहरू सड्न थालेका छन्। तीमध्ये केही शव पहिचान नै गर्न नसकिने अवस्थामा पुगेका छन् । दुर्गन्धित बनेका शवका कारण महामारी फैलिन सक्ने स्वास्थ्य विज्ञहरूको रायका आधारमा सुरक्षा समितिले गाड्ने निर्णय गरेको प्रजिअ अर्यालले बताए ।

प्रशासनले आज (शनिबार) सूचना जारी गर्दै ‘पहिचान नभएका तथा बेवारिसे शव व्यवस्थापन निर्देशिका, २०८३’ बमोजिम सुरक्षित र कानुनी रूपमा जमिनमा व्यवस्थापन गरिने जनाएको छ ।

सबै शवको डिएनए नमुना सङ्कलन गरी सङ्केत नम्बरका आधारमा अभिलेख राखिनेछ । त्यसपछि भरतपुर महानगरपालिका–१ देवघाटस्थित खुला स्थानमा शव व्यवस्थापन गरिनेछ ।

प्रशासनले शोकको यस परिस्थितिमा निर्णयलाई सकारात्मक रूपमा लिइदिन आग्रह गर्दै पीडित परिवारलाई पर्न गएको असुविधाप्रति क्षमायाचना पनि गरेको छ ।