कोशी ब्यारेजका २४ वटा ढोका खुला

इनरुवा । सप्तकोशी नदीमा जलसतह निरन्तर बढ्दै गएपछि कोशी ब्यारेजका २४ वटा ढोका खुला गरिएको छ ।

प्रहरीका अनुसार सोमबार बिहान ६ बजेसम्ममा सप्तकोशीको बहाव प्रतिसेकेण्ड २ लाख ११ हजार ५५ क्यूसेक मापन गरिएको छ । यद्यपि, पछिल्लो विवरण अनुसार बहाव केही घटेको छ । राति १२ बजे सबैभन्दा धेरै २ लाख १९ हजार क्यूसेक मापन गरिएको थियो ।

Advertisement

सुनसरी प्रहरीका सूचना अधिकारी डीएसपी चन्द्रबहादुर खड्काका अनुसार सप्तकोशीको बहाव घटबढ हुने क्रम जारी छ । पहाडी क्षेत्रमा लगातार वर्षा हुने क्रम जारी रहेका कारण आइतबार दिउँसोबाट कोशीको बहाव बढ्न थालेको थियो ।

जलस्तर बढ्न थालेपछि प्रहरीले सर्वसाधारणलाई सचेत गराउन थालेको थियो । तटीय क्षेत्रका बासिन्दालाई सुरक्षित स्थानमा रहन र सतर्कता अपनाउन आग्रह गरिएको जानकारी खड्काले दिए । सप्तकोशीमा १ लाख ५० हजार क्यूसेकसम्मको पानीको बहावलाई सामान्य मानिन्छ ।

‘बहाव तीव्र रूपमा बढ्न थालेपछि नदी तटीय क्षेत्रमा जोखिम बढ्न सक्ने देखिएकाले सर्वसाधारणलाई सचेत गराइएको थियो । अहिलेसम्म त्यति खतरा छैन । मध्यरातिको तुलनामा बहाव कम भएको छ । त्यही पनि तटीय क्षेत्रमा उच्च सावधानी अपनाउन आवश्यक छ,’ खड्काले भने । सप्तकोशीका सहायक नदीहरुमा बाढी आउने क्रम भने जारी रहेकाले सतर्कता आवश्यक रहेको प्रहरीको भनाइ छ ।

प्रहरीले विशेष गरेर बराहक्षेत्र नगरपालिका र कोशी गाउँपालिकाको नदी तटीय क्षेत्रमा बसोबास गर्ने नागरिकलाई सुरक्षित स्थानमा रहन अनुरोध गरेको छ । प्रहरीले नदीको बहाव बढिरहेका बेला माछा मार्ने, दाउरा टिप्ने, सेल्फी खिच्ने, भिडियो बनाउनेलगायत जोखिमपूर्ण गतिविधि नगर्न पनि आग्रह गरेको छ ।

अनावश्यक रूपमा नदी तथा खोलाको किनारमा नजान र सम्भावित जोखिमबाट जोगिन प्रहरीले स्थानीयलाई अपिल गरेको हो । नदीको अवस्था र प्रहरी तथा स्थानीय प्रशासनबाट जारी हुने सूचनामा ध्यान दिन प्रहरीले आग्रह गरेको छ ।