सुरुङको मुख खोल्न त्रिशूली–३ ‘ए’मा ब्लास्टिङ, पानी भरिएपछि प्रवेश रोकियो

काठमाडौं । भोटेकोशी नदीमा आएको बाढीका कारण क्षतिग्रस्त बनेको त्रिशूली जलविद्युत् आयोजना–३ ‘ए’को सुरुङको मुख खोल्न आज (सोमबार) बिहान ब्लास्टिङ गरिएको छ ।

सुरुङमा थुनिएको भाग हटाएर प्रवेशको अवस्था बनाउन बिहान करिब ३ बजेतिर ब्लास्टिङ गरिएको हो । तर, सुरुङभित्र ठूलो मात्रामा पानी भरिएका कारण तत्कालै भित्र प्रवेश गर्न सक्ने अवस्था नरहेको सांसद श्रीराम न्यौपानेले जानकारी दिए ।

Advertisement

उनका अनुसार सुरुङको मुखमा रहेको करिब ४० सेन्टिमिटर बाक्लो ढलान फुटाउन ब्लास्टिङ गरिएको हो । ब्लास्टिङ गरे पनि सुरुङको भित्री भाग पानीले भरिएकाले कामदार तथा प्राविधिक टोलीलाई भित्र प्रवेश गराउन कठिनाइ भएको छ ।

सांसद न्यौपानेले राति ब्लास्टिङ गरिए पनि सुरुङभित्र प्रवेश गर्ने अवस्था नबनेको बताएका छन् । उनका अनुसार सुरुङको मुख खोल्ने र भित्र प्रवेश गर्ने अवस्था बनाउने काम भने जारी छ ।

भोटेकोशी बाढीपछि सुरुङको मुख थुनिएसँगै आयोजना क्षेत्रमा क्षतिको अवस्था पहिचान गर्नसमेत कठिनाइ भइरहेको छ । त्यहाँभित्र फसेकाहरुको उद्धार गर्न समेत सम्भव भइरहेको छैन । सुरुङ खुलाएर भित्र प्रवेश गर्न सकिएपछि मात्रै आयोजनाभित्र भएको क्षतिको विस्तृत अवस्था पहिचान गर्न सकिने बताइएको छ ।