एउटै शवमा तीन परिवारको दाबी, पहिचानका लागि डीएनए परीक्षण हुँदै

पोखरा । भोटेकोशी बाढीमा परी ज्यान गुमाएकामध्ये पोखरा स्वास्थ्य विज्ञान प्रतिष्ठानमा राखिएको एउटा शवमा तीन परिवारले आफ्नो आफन्त भएको दाबी गरेका छन् । शवको अवस्था र उपलब्ध पहिचानका आधारबाट यकिन हुन नसकेपछि पहिचानका लागि डीएनए परीक्षणको प्रक्रिया अघि बढाइएको छ ।

कास्कीका प्रहरी प्रमुख एसपी नवीन कार्कीका अनुसार एउटै शवमा तीन परिवारले दाबी गरेपछि डीएनए परीक्षणमार्फत वास्तविक पहिचान खुलाइनेछ । परीक्षणको रिपोर्ट आएपछि मात्रै शव सम्बन्धित परिवारलाई बुझाइनेछ । भोटेकोशी बाढीले बगाएर ल्याएका १०२ शव पोखरा स्वास्थ्य विज्ञान प्रतिष्ठानको शवगृहमा राखिएको छ । अधिकांश शव क्षतविक्षत अवस्थामा रहेको प्रहरीले जनाएको छ । केही शव सग्लो अवस्थामा छैनन् भने केहीमा हातखुट्टालगायत शरीरका अंग मात्रै भेटिएका छन् ।

Advertisement

यस्तो अवस्थामा आफन्तहरूले कपडा, गहना, ट्याटु तथा शरीरमा रहेका अन्य चिन्हका आधारमा शव पहिचान गर्ने प्रयास गरिरहेका छन् । नुवाकोटका राजकुमार तामाङले आफ्ना पाँच वर्षीय छोरा प्रिन्सको शव विद्यालयको टाइ र घाँटीमा रहेको मालाबाट पहिचान गरेका थिए । भक्तपुरका सत्यकृष्ण पराजुलीले आफ्ना दाजु सत्यसुन्दर प्रजापतिको शव घाँटीमा रहेको ट्याटुबाट पहिचान गरेका थिए ।

तर सबै शवमा पहिचान खुल्ने स्पष्ट चिन्ह नहुँदा आफन्तलाई कठिनाइ भइरहेको छ । एउटै शवमा तीन परिवारले दाबी गरेको घटनाले बाढीपछि शव पहिचानमा देखिएको जटिलता थप स्पष्ट पारेको छ । शव पहिचानका लागि पोखरा स्वास्थ्य विज्ञान प्रतिष्ठानमा एक हजारभन्दा बढी आफन्त पुगेका छन् । प्रहरीले सहायता कक्षमार्फत उनीहरूलाई शव पहिचानमा सहजीकरण गरिरहेको जनाएको छ ।

संकलित १०२ शवमध्ये हालसम्म ४६ वटाको पोस्टमार्टम गरिएको छ । पोस्टमार्टम गरिएका शवमध्ये १० वटा पहिचान भइसकेका छन् । पहिचान भएका शव आफन्तले बुझेर लगेका छन् । पहिचान हुन नसकेका शव व्यवस्थापनको तयारीसमेत भइरहेको प्रहरीले जनाएको छ । तर डीएनए परीक्षणबाट पहिचान खुलेमा सम्बन्धित परिवारलाई शव बुझाउन सकिने प्रहरीको भनाइ छ ।