जलविद्युत् आयोजनाका सुरुङमा फसेकाको खोज तथा उद्धार तीव्र

काठमाडौं । भोटेकोशी बाढीका कारण विभिन्न जलविद्युत् आयोजनाका सुरुङमा फसेका व्यक्तिको खोज तथा उद्धार कार्यलाई तीव्र पारिएको छ । नेपाली सेनाको कमाण्डमा विशेषज्ञसहितको टोलीले जलविद्युत् आयोजनाका सुरुङलाई केन्द्रित गर्दै तीन दिनदेखि खोज तथा उद्धार अभियान जारी राखेको छ ।

सैनिक जनसम्पर्क तथा सूचना निर्देशनालयका अनुसार त्रिशूली–३ ‘बी’को सुरुङमा विज्ञसहितको टोली परिचालन गरी खोज तथा उद्धार भइरहेको छ । विदेशी विशेषज्ञसहितको संयुक्त टोलीले चिलिमे हाइड्रोको सुरुङभित्र करिब १०० मिटर प्रवेश गरी बेपत्ता व्यक्तिको खोजी गरिरहेको छ। सुरुङको केही भाग हिलोमाटोले पुरिएको अवस्थामा भेटिएको र त्यहाँबाट दुईवटा शव संकलन गरिएको सेनाले जनाएको छ ।

Advertisement

त्यस्तै, माथिल्लो त्रिशूली–१ आयोजनाको सुरुङभित्र करिब ३०० मिटरसम्म प्रवेश गरी खोजी गर्दा एउटा शव संकलन गरिएको छ । लाङटाङ आयोजनाको सुरुङमा पनि खोज तथा उद्धार कार्य जारी रहेको सेनाले जनाएको छ ।

त्रिशूली–३ ‘ए’ आयोजनाको सुरुङ खोल्न आज (सोमबार) बिहान करिब २ बजे विस्फोटक पदार्थ प्रयोग गरिएको थियो । हाल दुईवटा एक्स्काभेटरको प्रयोग गरी करिब १० मिटर गहिराइसम्म प्वाल बनाउने तथा सुरुङभित्र जमेको पानी, हिलो र लेदो हटाउने काम भइरहेको छ ।

बाढी प्रभावित क्षेत्रका जङ्गल, डाँडा, खोला तथा बस्तीमा उद्धारको आवश्यकता पहिचान गर्न पैदल गस्तीसमेत जारी रहेको निर्देशनालयले जनाएको छ ।

सैनिक प्रवक्ता राजाराम बस्नेतका अनुसार स्याफ्रुबेंसी क्षेत्रमा राहत तथा रासन वितरणसँगै लाङटाङ हाइड्रो क्षेत्रको निरीक्षण गरिएको छ । रसुवाको धुन्चे र नुवाकोटको त्रिशूलीमा सेनाले स्थापना गरेका आपत्कालीन उपचार केन्द्रबाट हालसम्म दुई हजार ६३२ जनाले स्वास्थ्य सेवा लिएका छन् ।

रसुवाको टिमुरेदेखि नुवाकोट, धादिङ, गोरखा, तनहुँ, चितवन, नवलपरासी पूर्व र नवलपरासी पश्चिमका बाढी तथा पहिरो प्रभावित क्षेत्रमा आठ हजार ९०० भन्दा बढी सुरक्षाकर्मी परिचालित भएका छन् ।

सुरक्षा फौजले घाइतेको खोज तथा उद्धार, शव व्यवस्थापनमा सहयोग, अवरुद्ध सडक सञ्चालन तथा आपत्कालीन उपचारलगायतका कामलाई निरन्तरता दिइरहेको छ ।

सेनाका अनुसार हालसम्म करिब २३ हजार १९४ किलो राहत सामग्री हेलिकप्टरमार्फत धुन्चेसहित विभिन्न प्रभावित क्षेत्रमा ढुवानी गरिएको छ । भदौ १० गतेदेखि आजसम्म नेपाली सेनाले ३३८ विदेशी नागरिकसहित कुल तीन हजार ५९६ जनाको उद्धार गरेको जनाएको छ ।