रसुवा बाढी : सेनाको हेलिकप्टरबाट ३३० जनाको उद्धार

काठमाडौं । रसुवामा आएको बाढीबाट प्रभावितको उद्धारका क्रममा नेपाली सेनाको तीनवटा हेलिकप्टरबाट हालसम्म ३३० जनाको उद्धार गरिएको छ ।

नेपाली सेनाका अनुसार आज (सोमबार) दिउँसो १ः३० बजेसम्म सेनाको हेलिकप्टरबाट ३३० जनाको उद्धार गरिएको हो । बाढीबाट प्रभावित जलविद्युत् आयोजनाका सुरुङमा समेत खोज तथा उद्धार कार्य जारी छ । त्रिशूली–३ हाइड्रोपावरको टनेलमा करिब १५ मिटरभित्र प्रवेश गरी खोज तथा उद्धारको काम भइरहेको सेनाले जनाएको छ ।

Advertisement

त्यस्तै, त्रिशूली हाइड्रोको थ्री बी टनेलमा विज्ञ फौजसहितको टोलीले खोज तथा उद्धार गरिरहेको छ । रसुवागढी हाइड्रोको टनेलमा भने संयुक्त टोलीले करिब २५० मिटरसम्म प्रवेश गरी खोजी गरेको थियो । त्यहाँ मानिस फेला नपरेपछि टोली फर्किएको सेनाले जनाएको छ ।

बाढीबाट प्रभावित जिल्लामा नेपाली सेनाका आठ हजार ९०० भन्दा बढी फौज प्रत्यक्ष रूपमा परिचालित छन् । सुरक्षाकर्मीले खोला, डाँडा तथा स्थानीयका घरघरमा पुगेर बेपत्ता तथा प्रभावितको खोजी र उद्धार कार्यलाई समन्वयात्मक रूपमा निरन्तरता दिइरहेका छन् ।