नोना कोइराला स्मृति प्रतिष्ठानद्वारा बाढीपीडितका लागि एक लाख सहयोग

विराटनगर । नोना कोइराला स्मृति प्रतिष्ठानले भोटेकोशी बाढीबाट प्रभावित नागरिकको राहत तथा उद्धारका लागि प्रधानमन्त्री दैवी प्रकोप उद्धार कोषमा एक लाख रुपैयाँ सहयोग गर्ने निर्णय गरेको छ ।

प्रतिष्ठानले भोटेकोशी बाढीका कारण रसुवा लगायतका क्षेत्रमा ठूलो जनधनको क्षति भएको भन्दै दुःख व्यक्त गरेको छ । बाढीमा नेपाली नागरिकसँगै विभिन्न देशबाट नेपाल भ्रमणमा आएका विदेशी पर्यटक तथा नागरिकले समेत ज्यान गुमाउनुपरेकोमा प्रतिष्ठानले शोक व्यक्त गरेको हो ।

Advertisement

प्रतिष्ठानले विपद्मा ज्यान गुमाएकाप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेको छ । साथै, घाइते तथा बिरामीको शीघ्र स्वास्थ्यलाभको कामना गर्दै बेपत्ता व्यक्तिको यथाशीघ्र खोजी तथा सुरक्षित उद्धारका लागि कामना गरेको छ ।

विपद्को यस घडीमा आफ्नो सामाजिक तथा नैतिक दायित्वलाई आत्मसात् गर्दै प्रधानमन्त्री दैवी प्रकोप उद्धार कोषमा १ लाख रुपैयाँ सहयोग गर्ने निर्णय गरिएको प्रतिष्ठानले जनाएको छ ।

प्रतिष्ठानले सरकारले उद्धार, राहत, उपचार तथा बेपत्ता व्यक्तिको खोजी कार्यलाई प्रभावकारी रूपमा अघि बढाउने विश्वाससमेत व्यक्त गरेको छ ।