भोटेकोशी बाढी : भान्सामै व्यस्त थिए महिला, एक्कासि बाढी आउँदा घरसँगै बेपत्ता

काठमाडौं । गत भदौ १० गते बुधबार बिहान । घरमा छोराछोरीलाई स्कुल पठाउने चटारो थियो । कोही खाना पकाउँदै थिए, कोही घरायसी काममा व्यस्त ।

त्यही बेला भोटेकोशीमा एक्कासि बाढी उर्लियो । के भइरहेको छ भन्ने थाहा पाउन नपाउँदै कतिपय महिला घरभित्रैबाट बेपत्ता भए । बाढी प्रभावित क्षेत्रको अवलोकन गरेर फर्किएकी महिला पुनर्स्थापना केन्द्र (ओरेक)की कार्यक्रम संयोजक सुलोचना खनालका अनुसार कतिपय महिलाले फोन गर्न वा फोन उठाउनसमेत पाएनन् ।

Advertisement

‘भान्सामा खाना पकाउनै व्यस्त थिए । भोटेकोशी बाढी उर्लिएर आएको मेसै पाएनछन् । अन्ततः उनीहरू घरभित्रैबाट बिलाए,’ खनालले भनिन्, ‘कतिले त फोन उठाउन पनि पाएनन् ।’ मंगलबार बाढी प्रभावित नुवाकोट, त्रिशूली र बेत्रावतीलगायतका क्षेत्रमा पुगेका महिला अधिकार क्षेत्रमा काम गर्ने संस्थाहरूले होल्डिङ सेन्टरमा रहेका महिला तथा किशोर–किशोरीलाई आवश्यक आन्तरिक सामग्री वितरण गरेका छन् ।

ओरेकसँगै तरङ्गिनी फाउन्डेसन, लुम नेपाललगायतका संस्थाहरू पनि प्रभावित क्षेत्रमा पुगेका छन् । खनालका अनुसार बाढीपछि महिला, बालबालिका र सुत्केरीको अवस्था थप जटिल बनेको छ ।

संयुक्त राष्ट्रसंघीय निकाय यूएन वुमेनले सार्वजनिक गरेको विवरणअनुसार भोटेकोशी बाढीबाट करिब १ लाख ६० हजार महिला तथा बालबालिका प्रभावित भएका छन् ।

यसैबीच, नुवाकोटको देवीघाट ज्येष्ठ नागरिक संरक्षण तथा अध्ययन प्रतिष्ठानमा रहेका ३४ ज्येष्ठ नागरिकमध्ये २४ जनाको उद्धार गरिएको छ । प्राप्त विवरणअनुसार पाँच जना अझै बेपत्ता छन् भने एक जनाको मृत्यु भएको छ । घाइते तथा स्वास्थ्य समस्या भएका ज्येष्ठ नागरिकको विभिन्न अस्पतालमा उपचार भइरहेको छ ।

उद्धार गरिएका मध्ये सात जनालाई आफन्तको जिम्मा लगाइएको छ भने १४ जनालाई नुवाकोटस्थित आयुर्वेद भवनमा राखिएको छ ।

नुवाकोटमा अलपत्र परेका करिब ४० विद्यार्थीको उद्धारका लागि सम्बन्धित निकायसँग समन्वय भइरहेको छ । अभिभावकबाट अलग भएका बालबालिकाको सुरक्षित संरक्षण, हेरचाह र व्यवस्थापनको काम भइरहेको महिला मन्त्री सीता बादीले बताएकी छन् ।