शव पहिचान गर्न डीएनए परीक्षण सुरु

काठमाडौं । रसुवाको भोटेकोशी नदीमा आएको बाढीपछि बेपत्ता भएका नागरिकको खोजी तथा फेला परेका बेवारिसे शव र मानव अंगको पहिचानका लागि नेपाल प्रहरीले डीएनए परीक्षण प्रक्रिया अघि बढाएको छ ।

भदौ १० गतेको भीषण बाढीपछि नदी किनार तथा तटीय क्षेत्रमा फेला परेका शव र मानव अंग पहिचान गर्न प्रहरीले मृतकका रगतका नातेदारबाट डीएनए नमुना संकलन गर्न थालेको हो ।

Advertisement

नेपाल प्रहरीले स्वदेश तथा विदेशमा रहेका बेपत्ता नागरिकका बाबु, आमा, छोरा वा छोरीमध्ये नजिकका एक जना रगतका नातेदारलाई डीएनए परीक्षणका लागि नमुना उपलब्ध गराउन आग्रह गरेको छ ।

प्रहरीका अनुसार नेपालमा रहेका आफन्तले दुई प्रति पासपोर्ट साइजको फोटोसहित नेपाल प्रहरी अस्पताल महाराजगञ्जको प्याथोलोजी ल्याब वा नजिकको जिल्ला प्रहरी कार्यालयमा सम्पर्क गर्नुपर्नेछ। डीएनए प्रोफाइलिङका लागि ताजा रगतको नमुना दिनुपर्नेछ ।

विदेशमा रहेका विदेशी तथा गैरआवासीय नेपालीका आफन्तले सम्बन्धित देशको आधिकारिक फोरेन्सिक प्रयोगशालाबाट ‘अटोसोमल एसटीआर डीएनए प्रोफाइलिङ’ गराउनुपर्नेछ । उक्त प्रोफाइलको डिजिटल प्रति नेपाल प्रहरीको आधिकारिक इमेलमा पठाउन प्रहरीले आग्रह गरेको छ ।

इमेलमार्फत विवरण पठाउँदा सम्बन्धित व्यक्तिको पूरा नाम र राष्ट्रियता, राहदानी वा आधिकारिक परिचयपत्रको विवरण, हराएको मिति र सम्भावित स्थान तथा मान्यताप्राप्त प्रयोगशालाको डीएनए प्रोफाइलिङ रिपोर्ट समावेश गर्नुपर्नेछ। साथै डीएनए नमुना दिने व्यक्ति र बेपत्ता व्यक्तिबीचको पारिवारिक नाता पनि खुलाउनुपर्नेछ ।