मन्त्रिपरिषद् बैठक बस्दै, भोटेकोशी बाढीबारे छलफल हुने

काठमाडौं । नेपाल सरकार मन्त्रिपरिषद्को बैठक आज बिहीबार बस्दैछ । प्रधानमन्त्री तथा मन्त्रिपरिषद्को कार्यालयमा आज (बिहीबार) दिउँसो ३ बजे बस्ने बैठकमा रसुवाको रसुवागढीस्थित भोटेकोशी नदीमा आएको विनाशकारी बाढी र त्यसबाट भएको क्षतिबारे छलफल हुने भएको छ ।

सरकारका प्रवक्ता एवं शिक्षा तथा खेलकुदमन्त्री सस्मित पोखरेलका अनुसार बैठकमा बाढीबाट प्रभावित क्षेत्रको पछिल्लो अवस्था, खोज तथा उद्धार, राहत तथा पुनःस्थापनालगायत विषयमा छलफल हुने छ ।

Advertisement

गत भदौ १० गते रसुवागढी क्षेत्रमा भोटेकोशी नदीमा आएको आकस्मिक बाढीले केही मिनेटमै ठूलो परिमाणमा पानी, माटो तथा गेग्रान बगाउँदा नदी आसपासका क्षेत्रमा ठूलो क्षति पुगेको थियो । बाढी त्रिशूली हुँदै नारायणी नदी प्रणालीसम्म पुगेको थियो ।

फ्ल्यास फ्लडका कारण रसुवा, नुवाकोट, धादिङ, गोरखा र चितवनका विभिन्न क्षेत्रमा जनजीवन तथा भौतिक पूर्वाधार प्रभावित भएका छन् । बाढीबाट सडक, पुल, विद्युत् तथा अन्य संरचनामा क्षति पुग्नुका साथै केही व्यक्ति बेपत्ता भएका छन् ।

यसअघि परराष्ट्रमन्त्री शिशिर खनालले भोटेकोशीमा आएको बाढीलाई ‘हिमालयन सुनामी’को संज्ञा दिएका थिए। सरकारले बाढीको कारण र विकासक्रमबारे प्राविधिक अध्ययनसमेत अघि बढाएको छ ।

आजको मन्त्रिपरिषद् बैठकमा विपद्पछिको तत्कालीन व्यवस्थापनसँगै प्रभावित क्षेत्रका लागि आवश्यक थप निर्णय हुने अपेक्षा गरिएको छ ।