विपत्तिमा धैर्य नगुमाई कर्तव्यप्रति निष्ठावान् हुन प्रधानमन्त्री शाहको आग्रह

काठमाडौं । प्रधानमन्त्री बालेन शाहले विपत्ति र चुनौतीका समयमा धैर्य नगुमाई आफ्नो कर्तव्यप्रति पूर्ण निष्ठाका साथ अघि बढ्न आग्रह गरेका छन् ।

श्रीकृष्ण जन्माष्टमीका अवसरमा शुभकामना सन्देश जारी गर्दै प्रधानमन्त्री शाहले विपत्ति र चुनौतीले मानिसको धैर्य तथा कर्मको परीक्षा लिने बताएका छन् । कठिन परिस्थितिमा आफ्नो जिम्मेवारी इमानदारी र पूर्ण निष्ठाका साथ पूरा गर्नु नै भगवान् श्रीकृष्णले सिकाउनुभएको वास्तविक कर्मयोग भएको उनको भनाइ छ ।

Advertisement

‘विपत्ति र चुनौतीहरू आउँछन्, जसले हाम्रो धैर्य र कर्मको परीक्षा लिन्छन् । यस्तो बेला पूर्ण निष्ठाका साथ आफ्नो भूमिका निभाउनु नै श्रीकृष्णले सिकाउनुभएको वास्तविक कर्मयोग हो,’ सन्देशमा भनिएको छ ।

प्रधानमन्त्री शाहले जन्माष्टमीको अवसरमा सबैलाई कर्तव्यपथमा दृढतापूर्वक टिकिरहने धैर्य, शक्ति र प्रेरणा प्राप्त होस् भन्ने कामना गरेका छन् । उनले देशवासी तथा सम्पूर्ण नेपालीमा सुख, शान्ति, समृद्धि र आपसी सद्भावको शुभकामनासमेत व्यक्त गरेका छन् ।