सञ्जय र कबीरको जीवितै उद्धारपछि परिवारमा खुसीयाली

काठमाडौं । भोटेकोशी नदीमा आएको विनाशकारी बाढीपछि माथिल्लो त्रिशूली–३ ‘ए’ जलविद्युत् आयोजनाको सुरुङभित्र फसेका दुई जनाको १० दिनपछि जीवितै उद्धार भएको छ ।

नेपाली सेना र सशस्त्र प्रहरीको संयुक्त टोलीले शुक्रबार बिहान सुरुङभित्रबाट ३० वर्षीय सञ्जय साह र कबीर महर्जनलाई सकुशल बाहिर निकालेपछि उनीहरूको परिवारमा खुसीयाली छाएको छ । सुरुङबाट जीवितै उद्धार गरिएका कबीर महर्जनका भाइ अमीर महर्जनले दाइ सकुशल रहेको खबर सुन्दा खुसीलाई शब्दमा बयान गर्न नसकेको बताए ।

Advertisement

उनले दाइलाई उपचारका लागि काठमाडौंको छाउनी अस्पताल ल्याइएको र परिवारका सदस्यहरू उनलाई भेट्न अस्पतालतर्फ गएको जानकारी दिए । ‘१० दिनपछि टनेलबाट सकुशल उद्धार गरिएका कबीर महर्जन मेरो दाइ हुन् । अहिले छाउनी अस्पताल ल्याइएको छ । उद्धार भएको सुन्दा एकदमै खुसी लागेको छ,’ अमीरले भने ।

उनका अनुसार दाइको अवस्थालाई लिएर १० दिनसम्म परिवारमा ठूलो चिन्ता थियो । दाइ सुरुङभित्र फसेको जानकारीसमेत परिवारले सञ्चारमाध्यमबाट थाहा पाएको थियो । ‘परिवारमा सबैलाई खुसीको सीमा नै छैन । अब शब्दले बयान गर्ने चिज नै भएन । सबै जना एकदम खुसी छौं,’ उनले भने ।

अमीरले उद्धारमा खटिएका नेपाली सेना, सशस्त्र प्रहरी तथा उद्धार विज्ञहरूलाई धन्यवाद दिएका छन् । आफूहरू घटनास्थलमा पुगेर दाइको खोजी गर्न सक्ने अवस्थामा नरहेको भन्दै उनले सञ्चारमाध्यमबाटै घटनाका बारेमा जानकारी लिइरहेको बताए ।

‘मुख्यगरी उद्धारमा लाग्नुभएका नेपाली सेना, सशस्त्र प्रहरी र सबै रेस्क्यु एक्स्पर्ट सरहरूलाई एकदमै धन्यवाद छ,’ उनले भने, ‘हामीले दाइ टनेलमा थुनिएको पनि मिडियाबाटै थाहा पायौं । अहिले सकुशल भएको खबर पनि मिडियाबाटै थाहा पायौं । आफैं खोज्न जाने अवस्था पनि थिएन । अहिले उहाँ सकुशल हुनुभयो, एकदमै खुसी छौं ।’ कबीर आयोजनामा कर्मचारीका रूपमा कार्यरत थिए । उनको नियमित ड्युटी नै त्यहीँ रहेको र कामकै क्रममा यस्तो विपत्ति आइपरेको परिवारले जनाएको छ ।

‘उहाँ कर्मचारी नै हो । त्यही काम गर्नुहुन्थ्यो । गइराख्नुहुन्थ्यो । ड्युटी नै त्यहीँ थियो । यस्तो होला भन्ने हामीले सोचेका पनि थिएनौं । अहिले अचम्म लागिराखेको छ,’ अमीरले भने ।

त्यस्तै, सुरुङबाट जीवितै उद्धार गरिएका अर्का व्यक्ति सञ्जय साहको परिवारमा पनि १० दिनदेखिको तनाव अन्ततः खुसीमा परिणत भएको छ । सप्तरीको तिलाठी–कोईलाडी गाउँपालिका–४ का ३० वर्षीय सञ्जय आयोजनाको कन्ट्रोल रुममा कार्यरत थिए । बाढी आएको दिन अरूको ज्यान बचाउने प्रयास गर्दागर्दै उनी आफैं सुरुङभित्र फसेका थिए ।

सञ्जयले बाढी आएपछि सुरुङभित्र रहेका अन्य व्यक्तिलाई बाहिर निकाल्न निरन्तर प्रयास गरेका थिए । धेरैलाई बाहिर पठाएपछि रात परेका कारण आफू भने सुरुङबाट निस्कन नसकेको उनले उद्धारपछि नेपाली सेनासँगको कुराकानीमा बताएका छन् ।

‘कन्ट्रोल रुममा काम गर्थें । त्यहाँ म भएपछि मेरो कर्तव्य सबैको ज्यान बचाउनु थियो । दुर्घटना भएपछि म एक्लै भागेर भएन, सबैलाई बचाउनुपर्‍यो,’ सञ्जयले भनेका छन् । उनका अनुसार आफूले अरूलाई बाहिर निस्कन लगाउँदै गर्दा आफ्नो समय बित्यो । ‘सबैलाई बाहिर भाग्न लगाउँदै थिएँ । त्यसो गर्दा मेरो समय नै भएन । रातमा म निस्कनै पाइनँ,’ उनले भने ।

सुरुङभित्र १० दिनसम्म रहँदा आफूले भगवानको ‘महामन्त्र’ जपिरहेको र त्यसैले आफ्नो ज्यान जोगिएको सञ्जयको विश्वास छ । सञ्जय जीवितै उद्धार भएको खबरले सप्तरीमा रहेका उनका परिवारका सदस्य भावुक बनेका छन् । छोराको सकुशल उद्धार भएको खबर सुन्नासाथ अर्धचेत अवस्थामा रहेका उनका बुवाको आँखाबाट खुसीका आँसु बगेको भाइ सञ्जीवले बताए ।

‘बुवा त बेहोसजस्तै हुनुहुन्थ्यो । राति हामी कोही परिवार सुतेकै थिएनौं,’ सञ्जीवले भने, ‘अहिले बुवा धेरै खुसी हुनुभएको छ । उहाँ खुसीको आँसु झार्दै विमानस्थलतर्फ जाँदै हुनुहुन्छ ।’ सञ्जयलाई भेट्न उनका बुवासँगै काका र काकी पनि काठमाडौं आउँदैछन् ।

सञ्जय बेपत्ता भएपछि उनकी श्रीमती पीडा सहन नसकेर माइती गएकी थिइन् । उनीहरूकी डेढ वर्षकी छोरी छिन् । शुक्रबार बिहान सञ्जय सकुशल उद्धार भएको खबर उनका भाइ सञ्जीवले नै भाउजूलाई फोन गरेर सुनाएका थिए ।

‘अहिले त भाउजु पनि धेरै खुसी हुनुहुन्छ । यो सोच्दै नसोचेको खुसी भयो,’ सञ्जीवले भने । बाढी आएको भदौ १० गते बिहान करिब ७ः४५ बजे सञ्जयले परिवारसँग करिब पाँच सेकेन्ड मात्र फोनमा कुरा गरेका थिए । त्यसपछि दिउँसो करिब १ बजेतिर परिवारले सामाजिक सञ्जाल र सञ्चारमाध्यमबाट आयोजनाको सुरुङमा बाढी पसेको र केही व्यक्ति सम्पर्कविहीन भएको जानकारी पाएको थियो । त्यसपछि सञ्जयलाई फोन गर्दा सम्पर्क हुन सकेन ।

१० दिनसम्म परिवारका लागि अनिश्चितता एवं चिन्ताको कारण बनेको यो घटनामा शुक्रबार बिहान नेपाली सेना र सशस्त्र प्रहरीको संयुक्त उद्धार टोलीले दुवैलाई जीवितै बाहिर निकालेपछि परिवारमा खुसी फर्किएको छ ।