बाढीमा बेपत्ता मोरङका मामा भान्जाको कुशको शव बनाएर अन्त्येष्टि

Share this
738shares
मुलुकी खबर
मुलुकी खबर
clock२०८३ भदौ १९, शुक्रबार १८:३९

विराटनगर । मोरङको बेलबारी–९ का २६ वर्षीय अनोज धमला भदौ १० गते रसुवाको भोटेकोशीमा आएको बाढीपछि बेपत्ता भए । बाढीमा बेपत्ता भएको लामो समयसम्म खोजी गर्दा पनि उनको अवस्था पत्ता लागेन। अन्ततः परिवारले आज (शुक्रबार) कुशको शव बनाएर उनको अन्त्येष्टि गरेको छ ।

अनोज मामा सोमनाथ कट्टेलसँग मानसरोवर यात्रामा गएका थिए । कोरियन भाषा परीक्षा र मेडिकल जाँच उत्तीर्ण गरेर उनी कोरिया जाने प्रतीक्षामा थिए । भिसाको टुंगो नलागेपछि आमाको उपचार खर्च जुटाउने उद्देश्यले मानसरोवर यात्रामा गएका थिए ।

सोमनाथ ‘सम्राट टुर एन्ड ट्राभल्स’का म्यानेजर हुन् र यसअघि पनि मानसरोवर यात्रामा गाइडका रूपमा काम गरिसकेका थिए । २२ दिनको यात्राबाट हुने आम्दानीले क्यान्सरबाट बिरामी आमा नैनकलाको उपचारमा सहयोग पुग्ने अनोजको आशा थियो । तर, बाढीपछि मामा–भाञ्जा दुवै बेपत्ता भए । उनीहरू सवार गाडीसमेत अहिलेसम्म फेला परेको छैन ।

अनोजका काका राजन घिमिरेले यतिका दिनसम्म अनेकतिर सोधीखोजी गर्दा पनि केही पत्तो नलागेपछि कुशको शव बनाएर अन्त्येष्टि गरिएको बताए । लक्ष्मीमार्गस्थित केसलिया घाटमा हिन्दू परम्पराअनुसार अनोजको अन्त्येष्टि गरिएको हो । उनका मामा सोमनाथको पनि तीन दिनअघि विराटनगरमै कुशको शव बनाएर अन्त्येष्टि गरिएको थियो ।

अनोजका दाजु निजी विद्यालयमा अध्यापन गर्छन् । आमाको उपचार खर्च जुटाउन अनोजले मानसरोवर यात्राबाट हुने आम्दानीलाई ठूलो सहारा मानेका थिए । तर, अहिले अनोजकै अन्त्येष्टि गर्नुपरेपछि परिवारलाई आमाको उपचार खर्च कसरी जुटाउने भन्ने चिन्ता थपिएको छ । भदौ १० गतेको भोटेकोशी बाढीमा परी कोशी प्रदेशबाट १६० जना बेपत्ता रहेको प्रहरीले जनाएको छ । तीमध्ये मोरङबाट अनोज र सोमनाथसहित १८ जना छन् ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.