पहिरो प्रभावित सडक खुलाउन सिजाङबाट नेपाललाई दुई बेलीब्रिजसहित सहयोग

काठमाडौं । नेपालमा बाढी र पहिरोका कारण अवरुद्ध भएका सडक तथा यातायात सञ्चालनलाई सहज बनाउन चीनको सिजाङ स्वायत्त क्षेत्रले नेपाललाई दुईवटा बेलीब्रिज निर्माण गर्न पुग्ने सामग्रीसहित आकस्मिक राहत सहयोग उपलब्ध गराएको छ ।

शिगात्सेस्थित रिजी बन्दरगाहमा आयोजित कार्यक्रममा उक्त राहत सामग्री नेपाली पक्षलाई औपचारिक रूपमा हस्तान्तरण गरिएको हो । राहत सामग्रीमा बेलीब्रिज निर्माणका लागि आवश्यक बेली प्यानल, सुदृढ सस्पेन्सन रड, सपोर्ट फ्रेम, डेकिङ, आई–बिमलगायतका संरचनात्मक उपकरण रहेका छन् ।

Advertisement

बाढी र पहिरोका कारण क्षतिग्रस्त तथा अवरुद्ध सडकखण्डमा पुल निर्माण गरी यातायात पुनः सञ्चालन गर्न यी सामग्री उपयोगी हुने बताइएको छ । यसबाट विपद् प्रभावित क्षेत्रमा खोज तथा उद्धारका साथै राहत सामग्री पुर्‍याउन पनि सहज हुने अपेक्षा गरिएको छ ।

सामग्री हस्तान्तरणका क्रममा रिजी बन्दरगाहमा चिनियाँ र नेपाली भाषामा लेखिएको ‘साझा हिमाल, साझा नदी—सुखदुःखमा सधैँ साथ, सिजाङ नेपालको सहयोगमा तत्पर’ भन्ने सन्देशसहितको ब्यानरसमेत प्रदर्शन गरिएको थियो । विपद्का बेला सिजाङले नेपाललाई गरेको सहयोग दुई देशबीचको आपसी सहयोग र मित्रताको निरन्तरताका रूपमा लिइएको छ ।

प्राकृतिक विपत्तिबाट प्रभावित नेपाली नागरिकलाई तत्काल राहत तथा आवागमन पुनःस्थापनामा सहयोग पुर्‍याउने उद्देश्यले सामग्री उपलब्ध गराइएको हो । यसैबीच, ल्हासास्थित सिजाङ स्वायत्त क्षेत्रको वैदेशिक मामिला कार्यालय र नेपाली महावाणिज्य दूतावासबीच सहयोगसम्बन्धी औपचारिक समझदारीसमेत भएको छ ।

सो अवसरमा ल्हासाका लागि नेपाली महावाणिज्यदूत लक्ष्मीप्रसाद निरौलाले नेपाल सरकारका तर्फबाट हस्तान्तरणसम्बन्धी प्रमाणपत्रमा हस्ताक्षर गरेका छन् । हस्तान्तरण कार्यक्रममा नेपाली पक्षले विपद्पछि चीनले देखाएको शीघ्र तत्परता र सहयोगप्रति धन्यवाद व्यक्त गरेको थियो ।

नेपाल र चीन साझा हिमाल तथा नदी प्रणालीबाट जोडिएका मुलुक भएकाले विपद्का समयमा हुने यस्तो सहयोगले दुई देशबीचको सहकार्यलाई थप बलियो बनाउने विश्वास व्यक्त गरिएको छ । सिजाङबाट प्राप्त बेलीब्रिज निर्माण सामग्री विशेषगरी बाढी तथा पहिरोले पुल र सडकमा क्षति पुर्‍याएका क्षेत्रमा तत्काल यातायात सञ्चालनमा ल्याउन उपयोगी हुने बताइएको छ ।