मोरङ, झापा र सुनसरीमा दुर्घटना : तीन जनाको मृत्यु, दुई जना घाइते

विराटनगर । मोरङ, झापा र सुनसरीमा भएका दुर्घटनामा तीन जनाको मृत्यु भएको छ । ज्यान गुमाउनेमा एक जना वृद्धा महिलासहित दुई जना पुरुष रहेका छन् । दुर्घटनामा दुई जना घाइते भएका छन् ।

मोरङको बेलबारी नगरपालिका–९ स्थित भित्री सडक खण्डमा स्कुटरको ठक्करबाट पैदलयात्री वृद्धाको मृत्यु भएको छ । लक्ष्मीमार्गबाट डाँगा बजारतिर जाँदै गरेको प्र १–०२–०५३ प ६६५१ नम्बरको स्कुटरले शुक्रबार साँझ ७ बजेतिर ठक्कर दिँदा अन्दाजी ७५ वर्षीय बेग्री राजवंशीको मृत्यु भएको प्रहरीले जनाएको छ ।

Advertisement

बाटो क्रम गर्दै गरेको अवस्थामा स्कुटरले ठक्कर दिँदा गम्भीर घाइते भएकी राजवंशीलाई उपचारका लागि विराटनगरको गोल्डेन अस्पताल पठाइएको थियो । अस्पताल पुर्याउनसाथ चिकित्सकले मृत घोषणा गरिदिएको जानकारी प्रहरीले दिएको छ ।

दुर्घटनामा स्कुटर चालक बेलबारी–८ का १७ वर्षीय अदित खवास र स्कुटरको पछाडि सवार १८ वर्षीय रुमन खवास घाइते भएका छन् । सामान्य अवस्थाका दुवै जनाको विराटनगरको नोबेल शिक्षण अस्पतालमा उपचार भइरहेको छ ।

प्रहरीले घटनाका बारेमा शनिबार बिहान ५ बजेतिर मात्रै जानकारी पाएको थियो । स्कुटरको तीव्र गतिका कारण दुर्घटना भएको प्रहरीको प्रारम्भिक अनुसन्धानबाट पत्ता लागेको छ । प्रहरीले घटनाको थप अनुसन्धान गरिरहेको छ ।

त्यस्तै, झापाको भद्रपुर नगरपालिका–२ चारआलीमा शुक्रबार साँझ सिटी सफारीको ठक्करबाट पैदलयात्रीको मृत्यु भएको छ । धिमालधुराबाट चारआलीतर्फ जाँदै गरेको प्र–१–०१–००२ ह ८४६८ नम्बरको सिटी सफारीले पैदलयात्री भद्रपुर–२ का ६४ वर्षीय पूर्णबहादुर पराजुलीलाई साँझ ६ः४५ बजेतिर ठक्कर दिएको थियो ।

प्रहरीका अनुसार दुर्घटनामा परेर गम्भीर घाइते भएका राजवंशीलाई उपचारका क्रममा ओमसाई पाथीभरा अस्पताल लगिएको थियो । उपचारकै क्रममा चिकित्सकले राति ९ः५० बजेतिर मृत घोषणा गरिदिएको प्रहरीले जनाएको छ ।

सफारी र चालक भद्रपुर–३ का ४२ वर्षीय रमेश माझीलाई प्रहरीले नियन्त्रणमा लिएर घटनाको अनुसन्धान सुरु गरेको छ । चालकसँग सवारी चालक अनुमतिपत्र (लाइसेन्स) नभएको पाइएको छ ।

यसैबीच, पूर्व–पश्चिम राजमार्गअन्तर्गत सुनसरीको कोशी गाउँपालिका–४ धर्मकाँटा नजिक बसबाट खसेर सहचालकको मृत्यु भएको छ । विराटनगरबाट नारायणगढतर्फ जाँदै गरेको प्र –०१–०२–००२ ख १२५५ नम्बरको बसबाट खसेर विराटनगर महानगरपालिका–१३ का २३ वर्षीय सापटे भनिने ईशोर श्रेष्ठको मृत्यु भएको प्रहरीले जनाएको छ ।

गुडिरहेको बसको ढोकाबाट शुक्रबार बिहान ७ः३० बजेतिर खसेर गम्भीर घाइते भएका श्रेष्ठलाई उपचारका लागि जिल्ला अस्पताल इनरुवा लगिएको थियो । अस्पताल पुर्याउनसाथ चिकित्सकले मृत घोषणा गरेको प्रहरीले जनाएको छ ।

बस र चालक रौतहटको चन्द्रपुर नगरपालिका–६ का ३७ वर्षीय गणेशबहादुर खपाङ्गी मगरलाई प्रहरीले नियन्त्रणमा लिएर घटनाको अनुसन्धान गरिरहेको छ । सहचालकले बसेको ढोका खुला राखेर यात्रा गर्दा दुर्घटना भएको प्रहरीको प्रारम्भिक अनुसन्धानबाट पत्ता लागेको छ ।