बाढीमा ज्यान गुमाएका सशस्त्र प्रहरीका परिवारलाई २५ लाख

काठमाडौं । सशस्त्र प्रहरी बल नेपालले कर्तव्य पालनाका क्रममा भोटेकोशी बाढीमा परी ज्यान गुमाएका सशस्त्र प्रहरीका आश्रित परिवारलाई २५ लाख रुपैयाँ राहत उपलब्ध गराउने भएको छ ।

सशस्त्र प्रहरी महानिरीक्षक नारायणदत्त पौडेलको अध्यक्षतामा बसेको परामर्श समितिको बैठकले तत्काल १५ लाख रुपैयाँ राष्ट्रसेवकका तर्फबाट, पाँच लाख रुपैयाँ ‘सशस्त्र प्रहरी कर्मचारीको मृत्यु भएमा निजको हकवाला, आश्रित परिवारलाई उपलब्ध गराउने राहतसम्बन्धी कार्यविधि, २०७९’ र थप पाँच लाख रुपैयाँ ‘सशस्त्र प्रहरी बल, नेपाल विपद् प्रकोप राहत कोष सञ्चालनसम्बन्धी मापदण्ड, २०८१’ अनुसार उपलब्ध गराउने निर्णय गरेको हो ।

Advertisement

त्यस्तै, मृतक कर्मचारीले कल्याण कोषबाट लिएको ऋणको बाँकी रकम मिनाहा गर्ने र उनका सन्ततिलाई पायक पर्ने नेपाल एपीएफ स्कुलमा कक्षा १० सम्मको अध्ययनका लागि शैक्षिक शुल्क छुट गर्ने निर्णय भएको सशस्त्र प्रहरीका सहप्रवक्ता शैलेन्द्र थापाले जानकारी दिए ।

भोटेकोशी बाढीमा परी मृत्यु भएका सशस्त्र प्रहरी कर्मचारीका परिवारका अन्य सदस्यलाई पनि प्रतिव्यक्ति एक लाख रुपैयाँ राहत दिने तथा मृतक सशस्त्र प्रहरीको स्मृतिमा स्मारक निर्माण गर्ने निर्णय भएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढीमा परी १३ जना सशस्त्र प्रहरी सम्पर्कविहीन छन्। बाढीबाट ज्यान जोगाउन सफल पाँच जना सशस्त्र प्रहरीलाई जनही ५० हजार रुपैयाँ प्रोत्साहन रकम दिने निर्णयसमेत भएको छ ।

त्यस्तै, बाढीमा परी अवकाशप्राप्त सशस्त्र प्रहरी कर्मचारीको मृत्यु भएमा एक लाख, घरवारविहीन भएमा एक लाख तथा आंशिक भौतिक क्षति भएका र घाइतेलाई ५० हजार रुपैयाँसम्म तत्काल राहत उपलब्ध गराइने थापाले बताए । सशस्त्र प्रहरीले प्रधानमन्त्री दैवी प्रकोप उद्धार कोषमा महानिरीक्षकदेखि जवानसम्मको तर्फबाट १५ करोड ५० लाख रुपैयाँ जम्मा गर्ने निर्णयसमेत गरेको छ । टिमुरेस्थित बोर्डर आउट पोस्ट र सुरक्षा बेस मैलुङमा कार्यरत रही बाढीबाट ज्यान जोगाउन सफल सशस्त्र प्रहरीको हकमा भने उक्त रकम कट्टा नगरिने थापाले जानकारी दिए ।