देशभर वर्षाको सम्भावना, केही ठाउँमा भारी वर्षा हुने

काठमाडौं । मनसुनी प्रणाली सक्रिय रहेका बेला आज (आइतबार) देशका अधिकांश भू–भागमा वर्षा हुने सम्भावना रहेको छ ।

मौसम पूर्वानुमान महाशाखाका अनुसार देशभर आंशिकदेखि सामान्य बदली रहनेछ भने विभिन्न प्रदेशका पहाडी, हिमाली र तराई क्षेत्रमा मेघगर्जनसहित वर्षा हुन सक्नेछ । दिउँसो विशेषगरी पहाडी क्षेत्रमा हल्कादेखि मध्यम वर्षाको सम्भावना छ ।

Advertisement

हिमाली भू–भागका केही स्थानमा वर्षासँगै हिमपात हुन सक्ने महाशाखाले जनाएको छ । तराईका विभिन्न क्षेत्रमा पनि मेघगर्जन र चट्याङसहित मध्यम वर्षा हुने अनुमान गरिएको छ ।

कोशी, बागमती र गण्डकी प्रदेशका हिमाली तथा पहाडी क्षेत्र, कर्णालीको पहाडी भू–भाग तथा लुम्बिनी र सुदूरपश्चिमका पहाडी तथा तराई क्षेत्रमा एक–दुई स्थानमा भारी वर्षा हुन सक्ने पूर्वानुमान छ ।

रातको समयमा पनि मौसममा उल्लेख्य सुधार आउने देखिएको छैन । कोशी, बागमती र गण्डकीका पहाडी भू–भागका धेरै स्थान तथा लुम्बिनी, कर्णाली र सुदूरपश्चिमका केही पहाडी क्षेत्रमा मेघगर्जन र चट्याङसहित मध्यम वर्षा हुन सक्नेछ ।

यस्तै, मधेश तथा कोशी प्रदेशका तराई क्षेत्रमा धेरै स्थानमा र बागमती, गण्डकी, लुम्बिनी तथा सुदूरपश्चिमका तराई क्षेत्रमा केही स्थानमा मध्यम वर्षाको सम्भावना रहेको छ । राति पनि कोशी, बागमती र गण्डकीका पहाडी क्षेत्र तथा कोशी, लुम्बिनी र सुदूरपश्चिमका तराई भू–भागका एक–दुई स्थानमा भारी वर्षा हुन सक्ने महाशाखाले जनाएको छ ।

भारी वर्षा हुन सक्ने क्षेत्रमा गेग्रानसहितको बाढी, नदी तथा खोलामा जलसतह बढ्ने, पहिरो र भू–क्षयको जोखिम हुन सक्ने भएकाले आवश्यक सतर्कता अपनाउन आग्रह गरिएको छ । वर्षाका कारण सडक तथा हवाई यातायात प्रभावित हुन सक्ने एवं कृषि, पर्यटन, पर्वतारोहण, स्वास्थ्य सेवा, उद्धार र राहतका काममा समेत असर पर्न सक्ने भएकाले मौसमसम्बन्धी पछिल्ला सूचना हेरेर मात्रै यात्रा तथा अन्य गतिविधि गर्न महाशाखाले अनुरोध गरेको छ ।