विराटनगरको राधाकृष्ण रथयात्रा : हजारौँको भिडमा हराए बालबालिका, प्रहरीको पहलमा भेटिए अभिभावक

विराटनगर । विराटनगरमा शनिबार निकालिएको ५९औँ राधाकृष्ण रथयात्राको भिडमा हराएका पाँच बालबालिकालाई प्रहरीले उद्धार गरी अभिभावकको जिम्मा लगाएको छ ।

हजारौँ मानिस सहभागी रथयात्राको भिडमा अभिभावकबाट छुटेका ५ र ६ वर्ष उमेरका तीन बालक र दुई बालिकालाई प्रहरीले शनिबार दिउँसो विभिन्न स्थानबाट उद्धार गरेको थियो । मोरङ प्रहरीका सूचना अधिकारी डीएसपी मकेन्द्रकुमार मिश्रका अनुसार उद्धार गरिएका बालबालिकामा बूढीगंगा गाउँपालिका–२ की ५ वर्षीया रुचिका राजवंशी, कटहरी गाउँपालिका–१ की ५ वर्षीया हसिना मल्लिक, विराटनगर महानगरपालिका–५ का ५ वर्षीय हेमन्त पण्डित तथा विराटनगर–६ का ६ वर्षीय सिद्धार्थ पासवान र शिवम् पासवान रहेका छन् ।

Advertisement

उद्धारपछि रुचिका, हसिना र हेमन्तलाई विराटनगरस्थित वडा प्रहरी कार्यालयमा तथा सिद्धार्थ र शिवम्लाई जिल्ला प्रहरी कार्यालय मोरङमा राखिएको थियो । अभिभावक सम्पर्कमा नआएसम्म उनीहरूलाई प्रहरीको संरक्षणमा राखिएको डीएसपी मिश्रले बताए ।

प्रहरीले बालबालिका हराएको जानकारी गराउँदै अभिभावकलाई सम्पर्कमा आउन आग्रह गरेको थियो । त्यसपछि सम्बन्धित अभिभावक प्रहरी कार्यालयमा पुगेपछि आवश्यक पहिचान तथा समन्वय गरी पाँचै जना बालबालिकालाई सकुशल अभिभावकको जिम्मा लगाइएको मिश्रले बताए ।

ठूलो धार्मिक तथा सार्वजनिक कार्यक्रममा हुने भिडभाड बालबालिकाका लागि जोखिमपूर्ण बन्न सक्ने यो घटनाले देखाएको मोरङ प्रहरी प्रमुख एसपी कवित कटवालले बताए । रथयात्राजस्ता कार्यक्रममा अभिभावकको ध्यान केही समय मात्र अन्यत्र जाँदा पनि बालबालिका भिडबाट छुट्टिन सक्ने भएकाले विशेष सतर्कता आवश्यक रहेको उनको भनाइ छ ।

‘बालबालिकालाई लिएर ठूलो भिडमा जाँदा अभिभावकले विशेष ख्याल गर्नुपर्छ । असावधानीका कारण बालबालिका अचानक अभिभावकबाट छुटेर अलमलमा परेका थिए,’ एसपी कटवालले भने, ‘प्रहरीले समयमै उद्धार गरेर अभिभावक पहिचान गरी जिम्मा लगाउन सफल भएको छ ।’ उनका अनुसार रथयात्रामा सहभागीको संख्या ठूलो हुने भएकाले बालबालिका हराउने, भिडमा अलमलिने वा असहज परिस्थितिमा पर्ने सम्भावना बढी हुन्छ ।

यस्तो अवस्थामा बालबालिकाको साथमा अभिभावकको सम्पर्क नम्बर राखिदिने, उनीहरूलाई अभिभावकको नाम र ठेगाना सम्झाइराख्ने तथा भिडमा बालबालिकालाई एक्लै नछाड्ने जस्ता सावधानी अपनाउन प्रहरीले आग्रह गरेको छ । शनिबारको घटनामा समयमै प्रहरीले उद्धार गर्न सकेकाले सबै जनालाई सुरक्षित रूपमा परिवारसम्म पुर्याउन सम्भव भएको हो ।

प्रहरीले सार्वजनिक तथा धार्मिक कार्यक्रममा बालबालिकाको सुरक्षालाई प्राथमिकतामा राख्न र भिडभाड भएका स्थानमा उनीहरूको गतिविधिमाथि निरन्तर निगरानी गर्न अभिभावकलाई आग्रह गरेको छ ।