कोशीसहित प्रमुख नदीमा जलसतह बढ्ने पूर्वानुमान

काठमाडौं । बाढी पूर्वानुमान महाशाखाले आगामी तीन दिन देशका प्रमुख नदीमा जलसतह बढ्ने पूर्वानुमान गरेको छ। महाशाखाले आज (मंगलबार) जारी गरेको बुलेटिनअनुसार भदौ ३० देखि असोज १ गतेसम्म कोशी, नारायणी र महाकाली नदी तथा तिनका मुख्य सहायक नदीमा जलसतह उल्लेख्य बढ्ने सम्भावना छ ।

कर्णाली, कन्काई, कमला, बागमती, पूर्वी राप्ती, पश्चिम राप्ती र बबई नदी तथा तिनका सहायक नदीमा भने जलसतह सामान्य बढ्ने अनुमान गरिएको छ ।

Advertisement

महाशाखाका अनुसार मंगलबार बिहानको मापनमा कोशी, नारायणी, बागमती, कर्णाली, महाकालीलगायत प्रमुख नदी तथा कन्काई, कमला, बबई, पूर्वी राप्ती र पश्चिम राप्ती नदीको बहाव सतर्कता तहभन्दा तल रहेको छ ।

मंगलबार ताप्लेजुङ, तेह्रथुम, सङ्खुवासभा, सोलुखुम्बु, सिन्धुपाल्चोक, काभ्रेपलाञ्चोक, काठमाडौँ, भक्तपुर, ललितपुर, गोरखा, तनहुँ, लमजुङ, कास्की, पर्वत, बागलुङ, म्याग्दी, बझाङ र बाजुरा तथा आसपासका जिल्लाबाट बहने ससाना नदीमा बहाव उल्लेख्य बढ्ने सम्भावना रहेको महाशाखाले जनाएको छ । ती क्षेत्रमा आकस्मिक बाढीको मध्यम जोखिम रहेको छ ।

भदौ ३१ गते सुदूरपश्चिम, लुम्बिनी र मधेस प्रदेशका केही ससाना नदीमा बहाव आकस्मिक रूपमा बढ्न सक्ने तथा असोज १ गते कोशी र मधेस प्रदेशका केही ससाना नदीमा पनि आकस्मिक बहाव बढ्न सक्ने महाशाखाको पूर्वानुमान छ ।