कांग्रेसको १५औँ महाधिवेशनमा ६ हजार ५२८ प्रतिनिधि सहभागी हुने

काठमाडौं । नेपाली कांग्रेसको १५औँ महाधिवेशनमा ६ हजार ५२८ जना प्रतिनिधि सहभागी हुने भएका छन् । महाधिवेशन तयारीबारे आज (बुधबार) पार्टी कार्यालय सानेपामा आयोजित पत्रकार सम्मेलनमा उक्त जानकारी दिइएको हो ।

निर्वाचन समिति सदस्यसचिव राजु कटुवालका अनुसार प्रत्येक निर्वाचन क्षेत्रबाट ३३ जना महाधिवेशन प्रतिनिधि चयन हुनेछन् । देशभरका १६५ निर्वाचन क्षेत्रबाट ५ हजार ४४५ जना प्रतिनिधि रहनेछन् ।

Advertisement

त्यसैगरी, प्रत्येक प्रदेशसभा निर्वाचन क्षेत्रबाट एक–एक जनाका दरले ३३० जना प्रदेशसभा सभापति महाधिवेशन प्रतिनिधिका रूपमा सहभागी हुनेछन् । ७५३ स्थानीय तहका सभापति पनि महाधिवेशन प्रतिनिधि रहनेछन् । यी सबै जोड्दा महाधिवेशन प्रतिनिधिको संख्या ६ हजार ५२८ पुग्ने कटुवालले बताए ।

कांग्रेसको १५औँ महाधिवेशन असोज १६ गतेदेखि काठमाडौंमा हुँदैछ । महाधिवेशनको तयारीस्वरूप वडा तहको अधिवेशन असोज ३ गतेदेखि सुरु हुनेछ ।

कांग्रेसको १४औँ महाधिवेशनमा ४ हजार ७४३ जना प्रतिनिधि सहभागी भएका थिए ।