गुटको घेराबाट बाहिर निस्कन डा. कोइरालाको आग्रह

काठमाडौं । नेपाली कांग्रेसका नेता डा. शेखर कोइरालाले पार्टीभित्र बढ्दै गएको विभाजन र गुटगत गतिविधिप्रति चिन्ता जनाउँदै आपसी संवाद र समझदारीमार्फत कांग्रेसलाई एकताबद्ध बनाउन आग्रह गरेका छन् ।

बिहीबार प्रेस विज्ञप्तिमार्फत उनले पार्टीको आसन्न महाधिवेशनसँगै मुलुकको पछिल्लो अवस्थालाई लिएर कांग्रेस गम्भीर बन्नुपर्ने बताएका हुन् । कांग्रेस आफ्नो राजनीतिक विरासत, आदर्श र सिद्धान्तबाट क्रमशः टाढिँदै गएको उनको भनाइ छ ।

Advertisement

डा. कोइरालाले पार्टीको वर्तमान अवस्थालाई विभाजित र गन्तव्यविहीन अवस्थासँग तुलना गर्दै संस्थापक नेता बीपी कोइरालाको राजनीतिक तथा नैतिक दर्शनलाई आत्मसात् गरेर अघि बढ्नुपर्नेमा जोड दिएका छन् । उनका अनुसार कांग्रेसभित्रको विभाजनले पार्टीको मात्रै नभई राष्ट्रियता र लोकतान्त्रिक आन्दोलनमासमेत असर पार्न सक्ने अवस्था देखिएको छ ।

प्राकृतिक विपद्बाट रसुवा, नुवाकोट, धादिङलगायतका जिल्लामा नागरिकले भोगिरहेको पीडाप्रति कांग्रेस पर्याप्त संवेदनशील हुन नसकेको भन्दै उनले असन्तुष्टि व्यक्त गरेका छन् । नागरिकले आफन्त गुमाइरहेको र पीडामा रहेको अवस्थामा पार्टीभित्र कानुन र विधानका विषयमै बढी अल्झिनु उचित नभएको उनको भनाइ छ ।

आसन्न दुईवटा महाधिवेशनलाई लिएर देखिएको विवादले पार्टीलाई थप विभाजित बनाउन नहुने भन्दै उनले मध्यमार्गी र विवेकपूर्ण समझदारीको बाटो खोज्नुपर्ने बताएका छन् । कसैलाई पराजित वा अपमानित गरेर विजयको उत्सव मनाउने संस्कार कांग्रेसको नभएको पनि उनले उल्लेख गरेका छन् ।

आफू कांग्रेस र मुलुकको लोकतन्त्र सफल भएको हेर्न चाहने एक कांग्रेस कार्यकर्ता भएको उल्लेख गर्दै डा. कोइरालाले पार्टीका नेता तथा कार्यकर्तालाई एकताको अभियानमा जुट्न आग्रह गरेका छन् । उनले आफू कसैप्रति आरोप–प्रत्यारोप गर्ने पक्षमा नरहेको स्पष्ट पार्दै संवाद र सहकार्यबाट पार्टीलाई पुनः एकताबद्ध बनाउन सकिने विश्वास व्यक्त गरेका छन् ।

‘हामी उठ्छौं, जुट्छौं र जित्छौं’ भन्ने विश्वाससहित गाउँदेखि विदेशसम्म रहेका कांग्रेसका नेता तथा कार्यकर्तालाई एकताको अभियानमा सहभागी हुन उनले अनुरोध गरेका छन् । पार्टीभित्रको संवाद र एकताको प्रयासलाई निरन्तरता दिने बताउँदै डा. कोइरालाले छिट्टै गाउँघर पुगेर कांग्रेसका नेता तथा कार्यकर्तासँग प्रत्यक्ष भेटघाट गर्ने प्रतिबद्धतासमेत जनाएका छन् ।