रास्वपा सचिवालय बैठकका सात निर्णय : अनुशासन आयोगमा १० जना थपिए, तीन विभागमा नयाँ जिम्मेवारी

Share this
788shares
मुलुकी खबर
मुलुकी खबर
clock२०८३ असोज ४, आइतबार १८:२६

काठमाडौं । सत्तारुढ राष्ट्रिय स्वतन्त्र पार्टी (रास्वपा)को सचिवालय बैठकले समसामयिक राजनीतिक परिस्थिति, विपद् व्यवस्थापन तथा पार्टीका आन्तरिक विषयमा छलफल गर्दै विभिन्न सात निर्णय गरेको छ ।

पार्टी केन्द्रीय कार्यालय घण्टीघरमा आइतबार बसेको बैठकले रसुवामा बाढीपछि विकसित घटनाक्रम, प्रधानमन्त्री बालेन्द्र शाह (बालेन)को संयुक्त राष्ट्रसंघको महासभामा सहभागिता तथा पार्टीका विभिन्न आयोग र विभागमा मनोनयनलगायत विषयमा निर्णय गरेको हो । बैठकपछि प्रवक्ता जगदीश खरेलले प्रेस विज्ञप्ति जारी गर्दै निर्णयहरू सार्वजनिक गरेका छन् । उनका अनुसार बैठकले पार्टी केन्द्रीय अनुशासन आयोगलाई पूर्णता दिने निर्णय गरेको छ ।

अनुशासन आयोगमा अधिवक्ता हरिचन्द्र भट्टराई, अधिवक्ता सुशीला सिंखडा, रामचन्द्र कार्की, अधिवक्ता शान्ता थापा, अधिवक्ता नन्दन तिमिल्सिना, अधिवक्ता रोहन बोहजू, अधिवक्ता भविन्द्र राई, अधिवक्ता सन्तोष आचार्य, अधिवक्ता सन्तोष बिसुंखे र अधिवक्ता श्वेता कुमारी मनोनित भएका छन् । त्यस्तै, युवा तथा खेलकुद तथा सशक्तिकरण विभागको उपप्रमुखमा ज्ञानेन्द्र मल्ललाई मनोनयन गरिएको छ । अन्तर्राष्ट्रिय सम्बन्ध तथा कूटनीतिक विभागको सदस्यमा महेश भट्ट, टासी लाजोम र हिक्मत जंग कार्कीलाई जिम्मेवारी दिइएको छ ।

सार्वजनिक सेवा तथा जनगुनासो व्यवस्थापन विभागको सदस्यमा जयराम गुरुङ र राजकुमार श्रेष्ठलाई मनोनयन गरिएको रास्वपाले जनाएको छ । बैठकले रसुवा बाढीपछिको अवस्थाका बारेमा आवश्यक छलफल गर्दै विपद्सँग सम्बन्धित विषयमा पार्टीको भूमिका र आगामी कदमबारे समेत छलफल गरेको थियो ।

त्यस्तै, प्रधानमन्त्री शाहको संयुक्त राष्ट्रसंघको महासभामा सहभागितासँग सम्बन्धित विषयमा पनि बैठकमा छलफल भएको प्रवक्ता खरेलले बताएका छन् । सचिवालय बैठकमा समसामयिक राजनीतिक परिस्थिति, विपद् व्यवस्थापन र पार्टीका आन्तरिक विषयलाई केन्द्रमा राखेर छलफल भएको रास्वपाले जनाएको छ ।

यस्ता छन् निर्णय

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.