रोजगारी सिर्जनाका लागि सरकार र निजी क्षेत्रबीच सहकार्य आवश्यक : मुख्यमन्त्री कार्की

Share this
721shares
मुलुकी खबर
मुलुकी खबर
clock२०८३ असोज १४, बुधबार १६:३८

इटहरी । कोशी प्रदेशका मुख्यमन्त्री हिक्मतकुमार कार्कीले मुलुकको विकास, समृद्धि र रोजगारी सिर्जनाका लागि सरकार र निजी क्षेत्रबीच सहकार्य आवश्यक रहेको बताएका छन्।

इटहरीमा आज (बुधबार) सातदिने रोजगार मेला तथा सीप प्रदर्शनीको उद्घाटन गर्दै मुख्यमन्त्री कार्कीले सङ्घीय, प्रदेश र स्थानीय सरकारसँगै निजी क्षेत्रलाई साथमा लिएर अघि बढ्नुपर्ने बताए। सरकार र निजी क्षेत्रबीच सहकार्य भए सीप विकास, उद्योग स्थापना र रोजगारी सिर्जनामा थप उपलब्धि हासिल गर्न सकिने उनको भनाइ छ।

निजी क्षेत्रको सम्भावनालाई उपयोग गर्न सरकारले उपयुक्त नीति, कानुनी तथा व्यवस्थापकीय व्यवस्था गर्नुपर्नेमा जोड दिँदै मुख्यमन्त्री कार्कीले सीप तथा तालिमका नाममा राज्यकोषबाट बर्सेनि ठूलो रकम खर्च भए पनि त्यसअनुसार रोजगारी सिर्जना गर्ने सीप विकास हुन नसकेको बताए।

उनले प्रदेश सरकारले साना तथा मझौला उद्यम सञ्चालनका लागि सहुलियतपूर्ण तथा न्यूनतम धितोमा ऋण उपलब्ध गराउने व्यवस्था गरेको जानकारी दिए। नेपालमा उत्पादन बढाउँदै स्वदेशी बजारसँगै छिमेकी मुलुकका बजारको सम्भावनासमेत उपयोग गर्नुपर्ने भन्दै उनले पर्यटन र घरेलु उत्पादनलाई जोडेर स्थानीयस्तरमै रोजगारीका अवसर विस्तार गर्न सकिने बताए।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.