करेन्ट लागेर भारतीय कामदारको मृत्यु

विराटनगर । मोरङको पथरीशनिश्चरे नगरपालिका–२ मा निर्माणाधीन खानेपानी ट्याङ्कीमा काम गर्ने क्रममा करेन्ट लागेर एक भारतीय कामदारको मृत्यु भएको छ।

राजकुमार चौहानको ठेक्कामा निर्माण भइरहेको खानेपानी ट्याङ्कीमा काम गर्ने भारतको गोरखपुर घर भएका करिब ४० वर्षीय बाबुराम राजपुतलाई काम गर्ने क्रममा करेन्ट लागेको थियो। गम्भीर घाइते भएका उनलाई उपचारका लागि बीपी कोइराला स्वास्थ्य विज्ञान प्रतिष्ठान, धरान लगिएको थियो।

उपचारका क्रममा बिहीबार बिहान अस्पतालले राजपुतलाई मृत घोषणा गरेको इलाका प्रहरी कार्यालय पथरीले जनाएको छ। घटनाबारे जानकारी पाएलगत्तै प्रहरी टोली घटनास्थलमा पुगेर थप अनुसन्धान गरिरहेको छ। शव अस्पतालकै शवगृहमा राखिएको प्रहरीले जनाएको छ।