टिपरको ठक्करले एक जनाको मृत्यु

सिरहा । सिरहाको कर्जन्हामा टिपरको ठक्करबाट ईभीमा सवार एक महिलाको मृत्यु भएको छ । दुर्घटनामा पाँच जना घाइते भएका छन् । पूर्वपश्चिम महेन्द्र राजमार्गअन्तर्गत कर्जन्हा नगरपालिका–४ भुल्केमा आज (शुक्रबार) पूर्वबाट पश्चिमतर्फ जाँदै गरेको ईभीलाई विपरीत दिशाबाट आउँदै गरेको टिपरले ठक्कर दिएको हो ।

दुर्घटनामा गम्भीर घाइते गोलबजार नगरपालिका–४ की करिब ४५ वर्षीया शोभाकुमारी यादवको फूलकुमारी महतो मेमोरियल अस्पतालमा उपचारका क्रममा मृत्यु भएको प्रहरीले जनाएको छ । गम्भीर घाइते २२ वर्षीया प्रियंका यादवलाई हेलिकोप्टरमार्फत काठमाडौंस्थित मेडिसिटी अस्पताल लगिएको छ भने अर्की घाइते ललिता महतोलाई विराटनगर पठाइएको छ । तीन घाइतेको कर्जन्हामै उपचार भइरहेको छ ।

दुर्घटनामा परेका सबैजना जितिया पर्वका व्रतालु रहेको पारिवारिक स्रोतले जनाएको छ । उनीहरू कमला नदीमा नुहाउन जाँदै थिए । टिपर र चालकलाई प्रहरीले नियन्त्रणमा लिएको छ ।