१२ विधेयक पारित गर्दै सकियो प्रतिनिधिसभाको दोस्रो अधिवेशन

काठमाडौं । प्रतिनिधिसभाको दोस्रो अधिवेशन १२ वटा विधेयक पारित गर्दै शुक्रबार औपचारिक रूपमा समापन भएको छ । १४५ दिनसम्म चलेको अधिवेशनमा आर्थिक विधेयक २०८३, विनियोजन विधेयक २०८३ र सम्पत्ति शुद्धीकरण निवारण तथा केही अन्य कानुनलाई संशोधन गर्ने विधेयकलगायत महत्त्वपूर्ण विधेयक पारित भएका हुन् । पारितमध्ये ११ वटा विधेयक राष्ट्रपतिबाट प्रमाणीकरणसमेत भइसकेका छन् ।

अधिवेशनमा पारित हुन बाँकी २० वटा विधेयक विभिन्न संसदीय समितिमा विचाराधीन छन् भने केही विधेयक थप प्रक्रियामा रहेका छन् । विधायकी कामकारबाहीका दृष्टिले दोस्रो अधिवेशन फलदायी रहेको सभामुख डोलप्रसाद अर्यालले समापनका क्रममा बताएका छन् ।

गत वैशाख २८ गते सुरु भएको अधिवेशन असोज १६ गतेसम्म चलेको थियो। यस अवधिमा ६२ दिनमा प्रतिनिधि सभाका ६८ वटा बैठक बसेका थिए । संसद् सचिवालयका अनुसार अधिवेशनमा २७७ घण्टा ३० मिनेट संसदीय समय व्यतीत भएको छ । संघीय संसद्का दुवै सदनको संयुक्त बैठकसमेत बसेका थिए ।

अधिवेशनका क्रममा सरकारले प्रस्तुत गरेको नीति तथा कार्यक्रम पारित हुनुका साथै राजस्व र व्ययको वार्षिक अनुमानमाथि छलफल गरी बजेट कार्यान्वयनको बाटोसमेत खुलेको थियो । विभिन्न संवैधानिक निकायका वार्षिक प्रतिवेदन सभामा पेस भएका थिए भने सरकारका मन्त्रीहरूले सांसदहरूले उठाएका जनसरोकारका विषयमा प्रश्नोत्तरमार्फत जवाफ दिएका थिए ।

विपद् व्यवस्थापन र बाढीपहिरो प्रभावितको उद्धार तथा राहत पनि अधिवेशनका प्रमुख विषय बने । भोटेकोसी र त्रिशूली नदीमा आएको बाढीबाट भएको जनधनको क्षतिप्रति सभाले दुःख व्यक्त गर्दै विशेष प्रस्ताव पारित गरेको थियो ।

जलवायु परिवर्तनको प्रभाव र विपद् व्यवस्थापनका विषयमा अध्ययन गर्न १५ सदस्यीय विशेष संसदीय समिति गठन गरिएको थियो । सभामुख अर्यालले संसद्ले विपद् व्यवस्थापनसहित जनसरोकारका विषयमा पनि गम्भीर भूमिका खेलेको बताएका छन् ।