एमाले स्थायी कमिटी बैठक बस्दै, पार्टी कमिटीलाई पूर्णता दिने तयारी

काठमाडौं । नेकपा एमालेको स्थायी कमिटी बैठकले पार्टीका विभिन्न कमिटी र संगठनलाई पूर्णता दिने विषयमा निर्णय गर्ने भएको छ । पार्टी कार्यालय च्यासलमा आज (शुक्रबार) दिउँसो १ बजे बस्ने बैठकमा केन्द्रीय कमिटीबाट निर्णय हुन बाँकी विषयमा छलफल गरी टुंगो लगाउने तयारी रहेको उपमहासचिव लेखराज भट्टले बताए ।

बैठकमा पार्टीका विभाग, सल्लाहकार परिषद्, ज्येष्ठ कम्युनिस्ट मञ्च, पोलिटब्युरो र स्थायी कमिटीलाई पूर्णता दिने विषयमा छलफल हुनेछ । साथै, केन्द्रीय कमिटीमा मनोनयन गर्न बाँकी सदस्यबारे पनि निर्णय गर्ने तयारी छ ।

गत पुसमा ११औँ महाधिवेशन गरेको एमालेले अहिलेसम्म अधिकांश कमिटीलाई पूर्णता दिन सकेको छैन । बिहीबार बसेको बैठकले आगामी मंसिरमा राष्ट्रिय भेला आयोजना गर्ने तथा वडा र गाउँपालिका अधिवेशनका मिति तय गरेको थियो ।