पिजफायर सञ्चालकको मृत्यु प्रकरण : युवतीसँगको सम्बन्ध र आर्थिक हिसाबकिताबमाथि अनुसन्धान

विराटनगर । विराटनगरस्थित पिजफायर रेस्टुरेन्टका सञ्चालक मनोज खत्रीको मृत्यु प्रकरणलाई लिएर उनीसँग व्यक्तिगत सम्बन्धमा रहेकी एक युवती प्रहरी अनुसन्धानको दायरामा परेकी छन् ।

खत्रीको रेस्टुरेन्टमा करिब ४–५ वर्षदेखि काम गर्दै आएकी झापाकी २७ वर्षीया युवतीको व्यक्तिगत सम्बन्ध र रेस्टुरेन्टको आर्थिक हिसाबकिताबलाई केन्द्रमा राखेर प्रहरीले अनुसन्धान अघि बढाएको हो । मोरङ प्रहरी प्रमुख एसपी कवित कटवालका अनुसार खत्रीले सञ्चालन गर्दै आएको रेस्टुरेन्टको आर्थिक हिसाबकिताबसमेत ती युवतीले हेर्दै आएकी थिइन् ।

प्रारम्भिक अनुसन्धानमा खत्री र युवतीबीच प्रेम सम्बन्ध रहेको खुलेको प्रहरीले जनाएको छ । युवतीले पनि प्रहरीसमक्ष आफू खत्रीसँग केही समयदेखि व्यक्तिगत सम्बन्धमा रहेको स्वीकार गरेकी छन् ।

प्रहरीले युवतीलाई शनिबार राति नै पक्राउ गरी अनुसन्धान अघि बढाएको हो । उनीविरुद्ध आत्महत्या दुरुत्साहनसम्बन्धी कसुरमा अनुसन्धान अघि बढाउने तयारी प्रहरीले गरेको छ । यद्यपि, खत्रीको मृत्युमा युवतीको संलग्नता वा उनको व्यवहारको कुनै भूमिका छ वा छैन भन्ने विषय अनुसन्धानबाट पुष्टि भइसकेको छैन ।

प्रहरीले खत्री र युवतीबीच पछिल्लो समय सम्बन्धमा खटपट देखिएको तथा रेस्टुरेन्टको आर्थिक कारोबारसम्बन्धी विषय पनि अनुसन्धानयोग्य रहेको जनाएको छ । व्यक्तिगत सम्बन्धमा आएको उतारचढाव वा आर्थिक हिसाबकिताबमा कुनै अनियमितता भएको थियो कि भनेर प्रहरीले विभिन्न कोणबाट अनुसन्धान गरिरहेको छ ।

प्रहरीका अनुसार युवतीले रेस्टुरेन्टको सम्पूर्ण हिसाबकिताब आफूले हेर्दै आएको स्वीकार गरे पनि त्यसमा कुनै अनियमितता नभएको दाबी गरेकी छन् । खत्रीलाई आफूले तनाव नदिएको र ‘ब्ल्याकमेलिङ’समेत नगरेको उनको भनाइ छ । तर, प्रहरीले डिभाइस परीक्षण गर्ने लगायतका प्राविधिक पक्षबाट पनि अनुसन्धान गरिरहेको छ ।

अनुसन्धानका क्रममा युवतीले पछिल्लो समय आफूहरूबीच सामान्य खटपट भइरहेको प्रहरीलाई बताएकी छन् । उनका अनुसार करिब १० दिनदेखि खत्रीले दैनिक अत्यधिक मदिरा सेवन गर्ने गरेका थिए । सम्झाउँदासमेत मदिरा सेवन गर्न नछाडेको उल्लेख गर्दै उनले खत्रीको मृत्युमा आफ्नो कुनै दोष नरहेको दाबी गरेकी छन् ।

प्रहरीले भने खत्रीको व्यक्तिगत सम्बन्ध, पछिल्लो व्यवहार र आर्थिक कारोबारका पक्षलाई जोडेर घटनाको वास्तविकता पत्ता लगाउने प्रयास गरिरहेको छ । घटनासँग सम्बन्धित हुन सक्ने अन्य व्यक्तिलाई पनि निगरानीमा राखिएको प्रहरी स्रोतले जनाएको छ ।

विराटनगर महानगरपालिका–३ निवासी ५१ वर्षीय खत्री शुक्रबार दिउँसो करिब १ बजे स्कुटर लिएर घरबाट निस्किएका थिए । त्यसपछि परिवारसँग सम्पर्कविहीन भएका उनी शनिबार अपराह्न मोरङको केराबारी गाउँपालिका–९ स्थित धारापानी जंगलमा रुखमा झुण्डिएको अवस्थामा मृत फेला परेका थिए । स्थानीयले शव देखेपछि प्रहरीलाई खबर गरेका हुन् ।

परिवारका सदस्यले पहिचान गरेपछि शनिबार साँझ करिब ७ बजे उनको सनाखत भएको थियो । खत्रीले प्रयोग गरेको स्कुटर भने फेला परिसकेको छैन । स्कुटरको अवस्थासहित घटनासँग सम्बन्धित अन्य तथ्यका बारेमा अनुसन्धान जारी राखेको एसपी कटवालले बताए ।

खत्री विवाहित हुन् । उनका श्रीमती, एक छोरा र एक छोरी छन् । घटनाका बेला उनकी श्रीमती भारतमा रहेको र फर्किएर आएपछि परिवारका सदस्यको उपस्थितिमा पोस्टमार्टम प्रक्रिया अघि बढाइने प्रहरी स्रोतले जनाएको छ । युवती पनि अविवाहित रहेको प्रहरीले जनाएको छ ।

खत्रीको शव पोस्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठानमा राखिएको छ । पोस्टमार्टम रिपोर्ट, प्राप्त हुने अन्य प्रमाण र अनुसन्धानबाट खुल्ने तथ्यका आधारमा मृत्युको कारण यकिन हुने एसपी कटवालले बताए ।

विराटनगरमा स्थापित रेस्टुरेन्टका रूपमा परिचित पिजफायरका सञ्चालक खत्रीको मृत्युको कारण अझै खुलेको छैन । प्रहरीले व्यक्तिगत सम्बन्ध र आर्थिक कारोबारलाई मृत्युको सम्भावित कारण मानेर प्रहरीले अनुसन्धान गरिरहेको छ । मृत्युको अन्य कारण पनि हुन सक्ने प्रहरीको भनाइ छ ।

पिजफायर रेस्टुरेन्टका सञ्चालक खत्री जंगलमा मृत फेला