प्रदेशस्तरीय छनोटमा कोशीका नौ जिल्लाको क्रिकेट टोली

विराटनगर । कोशी प्रदेशका पाँच जिल्लाका क्रिकेट संघले मात्रै नेपाल क्रिकेट संघ (क्यान) बाट मान्यता पाए पनि दशौँ राष्ट्रिय खेलकुद प्रतियोगिताका लागि आयोजित प्रदेशस्तरीय छनोटमा नौ जिल्लाले सहभागिता जनाएका छन् । मान्यता प्राप्त जिल्लाबाहिरका चार जिल्लासमेत सहभागी भएपछि यसपटकको छनोट प्रतियोगितामा क्रिकेटको विस्तार र सहभागिताको दायरा बढेको देखिएको छ ।

कोशी प्रदेशका मोरङ, झापा, सुनसरी, इलाम र उदयपुरका क्रिकेट संघले मात्रै क्यानबाट मान्यता पाएका छन् । प्रदेश खेलकुद विकास बोर्डले आयोजना गरेको दशौँ राष्ट्रिय खेलकुदका लागि पुरुष क्रिकेट छनोट प्रतियोगितामा भने प्रदेशका नौ जिल्लाका टोली सहभागी भएका छन् । प्रदेशस्तरीय क्रिकेट प्रतियोगितामा पहिलोपटक यति धेरै जिल्लाको सहभागिता भएको बोर्डका सदस्यसचिव विप्लव घोषले जानकारी दिए ।

विराटनगरस्थित मेरिलिबोन क्रिकेट मैदानमा शुक्रबारदेखि सुरु भएको प्रतियोगितामा मोरङ, झापा, सुनसरी, इलाम र उदयपुरसँगै धनकुटा, पाँचथर, खोटाङ र ताप्लेजुङका टोली सहभागी छन् । मंसिर १ गतेसम्म सञ्चालन हुने प्रतियोगिताबाट दशौँ राष्ट्रिय खेलकुदमा कोशी प्रदेशको प्रतिनिधित्व गर्ने खेलाडी छनोट गरिनेछ ।

क्यानबाट मान्यता पाएका पाँच जिल्लामा मात्रै सीमित नभई अन्य जिल्लाका खेलाडीलाई समेत प्रदेशस्तरीय छनोटमा अवसर दिइनुले प्रतियोगिताको दायरा फराकिलो बनेको सदस्यसचिव घोषले बताए । उनका अनुसार नौ जिल्लाको सहभागिताले राष्ट्रिय प्रतियोगिताका लागि खेलाडी छनोटसँगै प्रदेशका विभिन्न जिल्लामा क्रिकेट खेलिरहेका खेलाडीको क्षमता पहिचान गर्ने अवसरसमेत सिर्जना गरेको छ ।