
काठमाडौं । सर्लाहीको सदरमुकाम मलंगवामा आइतबार साँझ एक सरकारी कर्मचारीमाथि अज्ञात समूहले गोली प्रहार गरेको छ ।
पूर्वाधार विकास कार्यालय मलंगवामा कार्यरत सब–इन्जिनियर प्रमोदकुमार यादवमाथि कार्यस्थल नजिकै आक्रमण भएको प्रहरीले जनाएको छ ।
सिराहाको सुखीपुर घर भई मलंगवा नगरपालिका–१० मा डेरा गरी बस्ने यादवमाथि साँझको समयमा अज्ञात समूहले चलाएको गोली यादवको देव्रे छातीमा लागेको छ ।
गम्भीर घाइते भएका यादवको हाल प्रादेशिक अस्पताल मलंगवामा उपचार भइरहेको छ । घटनाको जानकारी पाउनासाथ प्रहरी टोली पुगेर घाइतेको उद्धार गरेको हो ।
घटनापछि सदरमुकाम मलंगवाको सुरक्षा व्यवस्था निकै कडा पारिएको छ । घटनामा संलग्नको खोजी तीव्र पारिएको र घटनाको सूक्ष्म अनुसन्धान सुरु गरिसकेको प्रहरीले जनाएको छ ।

























