
काठमाडौं । राष्ट्रिय मानव अधिकार आयोगले आगामी निर्वाचनका क्रममा शान्ति सुरक्षाको अवस्थालाई थप मजबुत बनाउन सरकार र सरोकारवाला निकायसँग आग्रह गरेको छ। आयोगका सहसचिव एवं प्रवक्ता डा. टीकाराम पोखरेलले बुधबार एक विज्ञप्ति जारी गर्दै निर्वाचन नजिकिँदै गर्दा देशका विभिन्न भागमा भएका हिंसात्मक गतिविधि र विवादप्रति गम्भीर ध्यानाकर्षण भएको जनाएका हुन्।
आयोगले पछिल्लो समय दाङमा दलका कार्यकर्ताबीच भएको झडप तथा रौतहट र पर्सामा विभिन्न समूहबीचको विवादका कारण निषेधाज्ञा जारी गर्नुपरेको घटनालाई निर्वाचन सुरक्षाको मुख्य चुनौतीका रूपमा लिएको छ। “यी घटनाहरूले निर्वाचनको स्वच्छ वातावरण र नागरिकको शान्ति सुरक्षामा गम्भीर प्रश्न उठाएको छ,” विज्ञप्तिमा भनिएको छ।
यसका साथै राजनीतिक दलका नेता, उम्मेदवार र कार्यकर्ताहरूले एक-अर्काप्रति प्रयोग गर्ने अमर्यादित एवं घृणायुक्त अभिव्यक्तिले समाजमा थप उत्तेजना र मुठभेडको स्थिति सिर्जना गर्न सक्ने भन्दै आयोगले सचेत गराएको छ। आयोगले निर्वाचनको प्रचारप्रसार र राजनीतिक गतिविधिमा बालबालिकाको प्रत्यक्ष वा परोक्ष प्रयोग भइरहेको सूचना प्राप्त भएको भन्दै यस्तो कार्य निर्वाचन आचारसंहिता र बाल अधिकारको गम्भीर उल्लंघन भएको स्पष्ट पारेको छ।
निर्वाचनलाई भयरहित, निष्पक्ष र मर्यादित बनाउनका लागि राजनीतिक दलहरूलाई संयमित हुन र सुरक्षा निकायलाई उच्च सतर्कता अपनाउन आयोगले विशेष निर्देशन दिएको छ।

























