
विराटनगर । गृहमन्त्री ओमप्रकाश अर्यालले निर्वाचन सम्पन्न भइसकेपछि मतदान केन्द्रबाट मतगणना स्थलसम्म मतपेटिका ढुवानी गर्ने जिम्मा नेपाल प्रहरीले नै सम्हाल्ने स्पष्ट पारेका छन् ।
केही सञ्चारमाध्यममा मतपेटिका नेपाली सेनाले ढुवानी गर्ने आशयका समाचार प्रकाशित भएपछि उत्पन्न भ्रम चिर्दै उनले स्थापित अभ्यासअनुसार नै सुरक्षा व्यवस्था कायम रहने बताएका हुन् । विराटनगरमा शुक्रबार सुरक्षा निकायका प्रमुखहरूसँग निर्वाचन सुरक्षा सम्बन्धी छलफल गरेपछि सञ्चारकर्मीसँग कुरा गर्दै मन्त्री अर्यालले एकीकृत सुरक्षा योजना लागू भइसकेको जानकारी दिए ।
उनका अनुसार मतपेटिका नेपाल प्रहरी र सशस्त्र प्रहरी बलको सुरक्षा घेराभित्रै मतदान अधिकृतले सुरक्षित रूपमा मतगणना स्थलसम्म पुर्याउने व्यवस्था मिलाइएको छ । निर्वाचन सुरक्षाको संरचना तीन तहमा रहने उनले बताए ।
मतदान केन्द्र र मतगणना स्थलको सुरक्षामा पहिलो घेरामा नेपाल प्रहरी, दोस्रो घेरामा सशस्त्र प्रहरी बल र तेस्रो घेरामा नेपाली सेना परिचालन हुनेछन् । यसअघिका निर्वाचनमा जस्तै यसपटक पनि समन्वयात्मक रूपमा सुरक्षाकर्मीलाई परिचालन गरिने उनको भनाइ छ ।
सरकारका प्रवक्ता समेत रहेका मन्त्री अर्यालले मतपेटिका ढुवानी र सुरक्षाका बारेमा अनावश्यक आशंका नगर्न आग्रह गर्दै सबै काम स्थापित मापदण्ड र कानुनी प्रावधानअनुसार हुने बताए । निर्वाचनलाई शान्तिपूर्ण, निष्पक्ष र भयरहित वातावरणमा सम्पन्न गराउन सुरक्षा निकायहरूबीच निरन्तर समन्वय भइरहेको जानकारी उनले दिए ।
उनले कुनै पनि अवस्थामा निर्वाचन तोकिएकै समयमा सम्पन्न हुने दाबी गर्दै वर्तमान सरकारले गैरदलीय र निष्पक्ष ढंगले काम गरिरहेको उल्लेख गरे । दण्डहीनताको अन्त्य सरकारको प्रमुख लक्ष्य रहेको बताउँदै कानुन उल्लंघन गर्ने जोकोहीमाथि कडा कारबाही गरिने उनले स्पष्ट पारेका छन् ।

























