
विराटनगर । पूर्व–पश्चिम राजमार्गअन्तर्गत मोरङको सुन्दरहरैँचा खण्डमा बुधबार अपरान्ह फेला परेको शंकास्पद वस्तु बम नरहेको पुष्टि भएको छ ।
सुन्दरहरैँचा नगरपालिका–१० स्थित सडकको उत्तर साइडमा अपरान्ह १२ः१५ बजेतिर कालो टेपले बेरेको र कालो तार बाहिर निकालिएको अवस्थामा सानो डल्लो भेटिएपछि त्रास सिर्जना भएको थियो । तर, नेपाली सेनाको टोलीले डिस्पोज गर्ने क्रममा उक्त वस्तु बम नभएको पत्ता लागेको हो ।
रंगको बट्टालाई टेपले बाँधेर सडकमा फालेको पाइएको प्रहरीले जनाएको छ । उक्त वस्तु बम नभएको यकिन भइसकेपछि सुरक्षाकर्मीको टोली घटनास्थलबाट फर्किसकेको छ ।

























