
काठमाडौं। राष्ट्रिय स्वतन्त्र पार्टीका नेता बालेन्द्र (बालेन) शाह झापामा मतदान केन्द्रहरूको निरीक्षणका लागि जाँदै गर्दा बीच बाटोबाटै काठमाडौँ फर्किएका छन्। बालेनको सचिवालयले सुरक्षा निकायको उच्च तहबाट आएको ‘सुरक्षा चेतावनी’ र ‘दबाब’ का कारण उनी फर्किएको स्पष्ट पारेको छ।
सचिवालय सदस्य सुरेन्द्र बजगाईंका अनुसार सुरक्षा निकायले झापा नजान दबाब दिएपछि बालेन चढेको हेलिकोप्टर त्रिभुवन विमानस्थलमा अवतरण गरेको हो। यसअघि निर्वाचन आयोगको अनुमति नलिएका कारण उनलाई फर्काइएको खबर सार्वजनिक भए पनि सचिवालयले भने आयोगबाट आवश्यक अनुमति लिइएको दाबी गरेको छ।
झापा क्षेत्र नम्बर ५ मा केपी शर्मा ओलीसँग प्रतिस्पर्धामा रहेका बालेन शाह काठमाडौँमा मतदान गरेर त्यता जान लागेका थिए। सुरक्षा निकायले कुन प्रकारको सुरक्षा चुनौती देखाएको हो भन्नेबारे भने विस्तृत विवरण बाहिर आएको छैन।

























