
भद्रपुर। प्रतिनिधिसभा सदस्य निर्वाचनअन्तर्गत झापा जिल्लामा हालसम्म ५० प्रतिशत मतदान भएको छ। जिल्ला निर्वाचन कार्यालयका अनुसार जिल्लाभर रहेका कुल ७ लाख १३ हजार ५३७ मतदातामध्ये ३ लाख ५६ हजार १८९ जनाले आफ्नो मताधिकार प्रयोग गरिसकेका छन्। खसेको मतमध्ये महिला १ लाख ८६ हजार ९४२ र पुरुष १ लाख ६९ हजार २४७ रहेका छन्।
निर्वाचन क्षेत्रअनुसारको विवरण हेर्दा क्षेत्र नम्बर ५ मा सबैभन्दा बढी ५४ प्रतिशत मतदान भएको छ। यस क्षेत्रमा कुल १ लाख ६३ हजार ३७९ मतदातामध्ये ८८ हजार ६४४ मत खसेको छ। यस्तै, क्षेत्र नम्बर ३ मा ५३ प्रतिशत अर्थात् ७३ हजार ९५६ मत खसेको छ।
झापा–१ मा ४७ प्रतिशत (६२ हजार ९ मत), झापा–२ मा ४९ प्रतिशत (७२ हजार १९० मत) र झापा–४ मा ४५ प्रतिशत (५९ हजार ३९० मत) मतदान भएको छ। जिल्लाका सबै मतदान केन्द्रहरूमा हालसम्म शान्तिपूर्ण रूपमा मतदान जारी रहेको सुरक्षा निकायले जनाएको छ।

























