
काठमाडौं। नेपालमा सम्पन्न प्रतिनिधि सभा सदस्य निर्वाचनको छिमेकी मुलुक भारतले स्वागत गरेको छ। भारतीय विदेश मन्त्रालयका प्रवक्ता रणधीर जयसवालले बिहीबार साँझ नयाँ दिल्लीमा आयोजित नियमित पत्रकार सम्मेलनमा नेपाली नागरिकले उत्साहका साथ लोकतान्त्रिक अधिकारको प्रयोग गरेकोमा खुसी व्यक्त गरेका हुन्।
गत वर्षको ‘जेन-जी विद्रोह’ र त्यसपछिको चुनौतीपूर्ण राजनीतिक परिस्थितिका बाबजुद सफलतापूर्वक निर्वाचन सम्पन्न गराएकोमा भारतले प्रधानमन्त्री सुशीला कार्की नेतृत्वको सरकार, नेपाली जनता र निर्वाचन आयोगलाई बधाई दिएको छ। प्रवक्ता जयसवालले नेपालको शान्ति, प्रगति र स्थिरताका लागि भारत सधैँ प्रतिबद्ध रहेको उल्लेख गर्दै नेपाल सरकारको अनुरोधमा निर्वाचनका लागि आवश्यक रणनीतिक तथा भौतिक सामग्रीहरू उपलब्ध गराएको समेत जानकारी दिए।
‘छिमेकी मुलुकको नाताले नेपालको लोकतान्त्रिक प्रक्रियालाई बलियो बनाउन भारतले निरन्तर सहयोग गर्दै आएको छ र आगामी दिनमा पनि यो सहकार्य जारी रहनेछ,’ प्रवक्ता जयसवालले भने। भारतले निर्वाचनपछि गठन हुने नेपालको नयाँ सरकारसँग मिलेर काम गर्न आफू इच्छुक रहेको समेत प्रस्ट पारेको छ।
दुई देश र जनताबीचको मजबुत एवं बहुआयामिक सम्बन्धलाई थप उचाइमा पुर्याउन र पारस्परिक हितका लागि नेपालको नयाँ नेतृत्वसँग सहकार्य गर्न भारत प्रतीक्षारत रहेको विदेश मन्त्रालयको सन्देशमा उल्लेख छ। विशेष गरी सीमावर्ती क्षेत्र झापा र मोरङमा भएको उत्साहजनक मतदानलाई भारतीय सञ्चारमाध्यमहरूले पनि प्राथमिकताका साथ कभरेज गरेका छन्।

























