
काठमाडौं । सुदूरपश्चिम प्रदेशका मतदाताले यसपटकको निर्वाचनमा पुराना र पटक-पटक राजकीय शक्तिमा पुगेका ११ पूर्वमन्त्री र एक पूर्वमुख्यमन्त्रीलाई संसद् छिर्ने बाटो बन्द गरिदिएका छन् । लामो समयदेखि राजनीतिमा दबदबा कायम राख्दै आएका नेताहरूलाई पाखा लगाउँदै जनताले नयाँ अनुहार र परिवर्तनलाई रोजेको चुनावी परिणामले देखाएको छ ।
अछाम-१ मा नेकपाका हेभीवेट नेता डा. भीमबहादुर रावललाई नेपाली कांग्रेसका भरतकुमार स्वारले ५२६ मतको झिनो अन्तरले हराए भने डोटीमा पूर्वमुख्यमन्त्री त्रिलोचन भट्ट चौथो स्थानमा खुम्चिन पुगे जहाँ कांग्रेसका भरतबहादुर खड्का विजयी भए ।
विशेषगरी राष्ट्रिय स्वतन्त्र पार्टी (रास्वपा) का नयाँ उम्मेदवारहरूले स्थापित नेताहरूको साख गिराउन मुख्य भूमिका खेलेका छन् । कैलाली-५ मा पूर्वमन्त्री प्रेमबहादुर आले रास्वपाका आनन्दबहादुर चन्दसँग र कञ्चनपुर-१ मा पूर्वमन्त्री बिना मगर रास्वपाकै जनकसिंह धामीसँग पराजित भए ।
यसैगरी कैलाली-४ मा एमालेका लेखराज भट्ट र कञ्चनपुर-२ मा कांग्रेसका नारायणप्रकाश साउदले पनि हार बेहोर्नुपरेको छ । बैतडीमा दामोदर भण्डारी, कञ्चनपुरमा मानबहादुर सुनार र तारा लामा तामाङ, बाजुरामा प्रकाशबहादुर शाह तथा कैलालीमा गौरीशंकर चौधरी र जनकराज चौधरीलाई पनि मतदाताले यसपटक पत्याएनन् । यद्यपि एमालेका गणेशबहादुर ठगुन्ना र कांग्रेसका जनकराज गिरीले भने प्रतिकूल लहरका बीच पनि आफ्नो क्षेत्र सुरक्षित राख्दै जित निकालेका छन् ।
























